قالت غادة والي مصممة الجرافيك: "المبلغ اللي أخدناه من تصميم اللوحة الجدارية لمحطة كلية البنات بمترو الأنفاق 77.042 جنيه.. مش ملايين زي ما بيقولوا، اللوحة الجدارية تمت إزالتها، بس فيه جداريات تانية في المترو في العباسية وهوليوبوليس والأوبرا ومحطات تانية لسة موجودة، والشركة الفرنسية هي اللي طلبت مننا نطلع الفراعنة سود؛ علشان لون السيراميك بس مكنش في مخنا إن الفراعنة سود ولا الموضوع ده خالص".
وأكدت في تصريحات تليفزيونية: "استعنا في عمل جدارية محطة كلية البنات بالرسومات اللي موجودة في معبد فيلة ومقبرة الملكة نفرتاري ونب آمون بالأقصر، أما الفنان الروسي مخدش زي اللي إحنا خدناه".
وأضافت: "أنا مش فنانة تشكيلية مش ببيع لوحات في معرض، ولكني مصممة جرافيك بعمل شغل بيزنس بناءً على طلب العميل".
وأكدت: "لو انا أخدت واقتبست من الفنان الروسي يبقى إحنا الاتنين واخدين من بيكاسو؛ لأن التكعيبة اللى عنده واللى احنا ماشيين بيها من بيكاسو، بالإضافة إلى أن الفنان الروسي قال إنه واخد من رسومات رومانية، إنما أنا واخدة معبد هابو بالأقصر".
وأوضحت: "الجدارية بتاعت محطة كلية البنات بتاعتي ورسومات الفنان الروسي هما الاتنين شبه بعض، علشان احنا الاتنين واخدين من نفس المدرسة الفرعونية وتكعيبة بيكاسو".
واعترفت غادة والي: "أنا و الفنان الروسي واخدين من نفس المدرسة ونفس الجداريات الفرعونية، وأنا بعترف أننا الاتنين واخدين من مدرسة واحدة".
ولفتت: "الشركة الفرنسية المسئولة عن إدارة المترو فسخت العقد معانا قبل مشكلة جدارية محطة كلية البنات، بسبب أننا طلعنا في برنامج واتكلمنا عن شغلنا من باب الترويج".
وأشارت: " الفنان الروسي مش مسجل لوحته في الفيبو الخاصة بحقوق الملكية الفكرية ودورنا علي كده ملقناش حاجة، وأنا في الأساس مش ناقلة منه ولا سرقت حاجة، وأنا عارفة أن اللى دبحني في الموضوع ده اعتذار المترو بس مرجعوش ليا وانا تألمت جدا لما شوفت مشهد إزالة الجدارية وأثر عليا نفسيا".
وعن رسومات شركة المياه الغازية:"القضية أن الفنان الروسي هو اللى سارق مننا لأن المدرسة الفرعونية احنا الاتنين واخدين منها، وهو بالنسبة لي بيهين البلد في اتهاماته ليا".
وأكدت: "أي مجال في الدعاية والإعلان ومن الوارد أن نكون تأثرنا ب الفنان الروسي جريجوري كوراسوف، احنا في عالم بيزنس وممكن حد من زمايلنا في الشركة يكون تأثروا بشكل ملحوظ برسومات الفنان الروسي".