الناس اللي هاتخش جهنم حدف بيشيعوا كذبًا وزورًا وبهتانًا إن الستة أيام تصييف فى "الساحل" بمليون جنيه حتة واحدة..!
أنا شخصيًا عندى عرض للتصييف فى "الساحل" بمية وخمسين جنيه بس.. ستة أيام "فول بورد".. مع جولات بالحنطور على طول الساحل وعرضه بروض الفرج والسبتية ودوران شبرا..!!
ومتاح فوق كل ده وده رحلات بالتوك توك، لمن يرغب، للدويقة ومنشية ناصر مع تقديم وجبات كشرى بالدقة وفول وطعمية من اختيار الشيف.. ومشروب الضيافة عرقسوس شفا وخمير...!!
ينقطع لسان كل اللى يقول إن التنسيق مفقود بين وزارات الحكومة؛ وإن ذلك هو سبب كل المشاكل والأزمات التى نواجهها حاليا..!
واللى زاد وغطى إنهم بيقولوا إن الوزراء مابيسمعوش لبعض رغم أنهم بيتكلموا "لبلب" بالساعات فى الاجتماعات الدورية لمجلس الوزراء..!
بصراحة عيب.. إن الكلام ده يتقال على حكومتنا الموقرة اللى قايدة لينا صوابعها شمع وبتتمنى لنا الرضا نرضا؛ وفوق كل ده وده شغالة زى الساعة.. لا بتقدم ولا بتأخر..!!
إعلامنا بتاع "ماقال لى وقلت له ياعوازل فلفلوا" ليه كل الحق طبعا إنه "يطنش" مايهتمش بأبطال مصر من بناتنا وأولادنا اللى حققوا بطولات عالمية فى العديد من اللعبات الأسبوع الماضى، هو إعلامنا فاضى لهم كفاية عليه تغطية أخبار الضرب والشتايم وسب الدين لبعض لعيبة كرة القدم.. والزيطة والزمبليطة ووصلات الردح المتبادلة بين قيادات الأندية..!
عمومًا أبطال العالم اللى شرفونا وشرفوا مصر هم: بطلات الذهب ( ملك إسماعيل و فريدة خليل وزينة عامر) اللى فازوا ب الميدالية الذهبية لبطولة العالم للشباب فى الخماسى الحديث؛ بعدما هزموا المجر وفرنسا وكوريا وبريطانيا وألمانيا وإيطاليا..والبطلة فاطمة غانم اللى فازت بالميدالية الذهبية لبطولة إفريقيا للجودو للشباب.. وبطلة السباحة العالمية فريدة عثمان.
أنشر أسماء كل هؤلاء الأبطال رغم أنف بتوع إعلام ما قال لى وقلت له يا عوازل فلفلوا..!!
بالمناسبة بعض الأهلاوية من قرائى زعلوا منى جدًا لأننى كتبت الأسبوع الماضى عن أن عقوبة لاعب الأهلى إياه، اللى ضرب لاعب آخر بالقلم وسب له الدين، حاجة ببلاش كدا واتهمونى بإنى زملكاوى..!
يا جماعة ألف مرة بأحلف لكم إنى لا زملكاوى ولا أهلاوى..
فالدم الذى يسرى فى شرايينى أحمر.. لكن قلبى أبيض.. بخطين..!!