كشف دكتور محمد أسامة، رئيس الجهاز الطبي بالزمالك، موقف محمود حمدي الونش لاعب الفريق الاول ل كرة القدم وحالة باقي المصاببن.
وقال محمد أسامة في مداخلة هاتفية ببرنامج “جمهور التالتة” عبرقناة “أون تايم سبورتس2″: ” ضميت للجهاز الطبي دكتور عمر أخصائي تغذية وهو شاطر جدا، ومكنش معنا بصورة دائمة في السابق كان كل لاعب بيتعامل مع دكتور خارجي وأنا بتابع، وجود دكتور تغذية أمر مهم بالنسبة لي، هو معايا من شهرين لمتابعته وهيفيدني في شغلي”.
وتابع: “إحنا من 4 سنين بنعمل قياسات بدنية للاعبين قبل بداية الموسم، وبسبب فترة الراحة الكبيرة كان عندي فرصة أبدأ صح وكابتن عبد الواحد ساعدني لأنه أمر مكلف جدا، العالم كله بيعمل على منع الإصابة وده ميزة القياسات اللي بتعملها قبل بداية الموسم”.
وشدد أسامة:” إحنا بنعمل شق طبي وشق آخر عضلي وبدني، ومعايا خريطة لكل لاعب وعارف مشكلة كل واحد فيهم وجزء من القياسات بيوضح نقطة ضعف كل عضلة وبيساعدنا نضع البرامج التدريبية لعلاجها، الفكرة كلها وضع خريطة للاعب”.
وأردف: “الجزء الطبي مهم وفي ناس تقولك هندفع كل ده علشان تحاليل بس، ده مهم للحفاظ على اللاعب وكل العالم بيعمله، بشكر الزمالك لأنه بيساعدني اعمل ده ومبسوط إن مستر أوسوريو كان بيتواجد معايا وده أول مدير فني يحضر القياسات البدنية”.
وواصل أسامة:” عبدالشافي من الناحية الفنية لا يعاني من أي إصابات وهو ملترم جدا في البرنامج التأهيلي لتجهيزه وهو من أحسن اللعيبة، هو من فترة طويلة مشاركش وكلها كام يوم هيدخل التدريب الجماعي”.
وأكمل: “ الونش لسه منعرفش هيرجع إمتى الدكتور اللي عمل العمليه هيحدد، بننهي المرحلة الأولى من التأهيل، ويهمني يرجع أقوى وأحسن وهناخد وقتنا لحين انتهاء البرنامج الموضوع له”.
واستطرد:”محمود علاء وأوباما ومصطفى شلبي شاركوا في التدريبات الجماعية، أنا حاولت أعرف هل في متحور كورونا، ومفيش معلومة تقول إن في حاجة”.
واختتم: ”بشكر كل الجهاز الطبي والفني والإداري وعملنا مجهود جامد وإن شاء الله ربنا يكرمنا ويكون موسم كويس للزمالك”.