علقت الإعلامية سارة نخلة عبر برنامجها فيس أوف والذى يعرض على شاشة قناة " هى" على انتقادات خبر وجود الفنانة القديرة سميحة أيوب في المقررات الدراسية قائله: " فى ناس بتقول ازاى يدرس الأطفال في المدارس عن الشخصيات دى.. الناس معترضة شايفة مينفعش ندرس ده في مادة دراسية".
وأوضحت حقيقة تدريس قصة حياة الفنانة سميحة أيوب في المناهج الدراسية الأساسية قائلة: " الحقيقة ده كان في كتاب أنشطة مش من المقررات الأساسية .. دى حاجة زى الأنشطة.. ولكن مهم أوى أن الأطفال يعرفوا يعنى أية أعمدة الفن المصرى.. زى ما احنا بنفتخر بمحمد صلاح و بعبد الحليم وسعاد حسنى".
وأضافت: "المفروض برضه الأطفال يعرفوا الأعمدة الأساسية للمسرح و الغناء و الفن.. الحاجات دى كلها.. اشمعنا مضايقوش لما أطفالكم الصغيرين عمالين يحفظوا حاجات عن المهرجانات.. لية عادى ابنى يردد كلمات أنا شايفاها مش مناسبة ليا.. واضايقوا أن الأطفال عايزينهم يعرفوا مين هى سيدة المسرح اللى الوطن العربى كله بيحبها وبيشهد لها بفنها وبزوقها واحترامها.. مضايقين لية دى حاجة المفروض تفرحوا بيها" .
وأكملت عن أهمية تدريس قصص أعمدة الفن للأطفال قائلة: "الطفل لما بيكون صغير وبيقعد جنب ناس مختلفى الجنسيات ويتذكر اسم سيدة المسرح يبقى عارف مين سيدة المسرح العربى".
برنامج "FACE OFF" تقدمه الإعلامية سارة نخلة على شاشة قناة هي يوميًا من السبت إلى الأثنين وتستضيف من خلاله عددا من نجوم الفن وتناقش القضايا المطروحة يوميًا بين الجمهور.