- الدمعة كانت هاتفر من عينى وأنا بأتابع تصريحات الحاج أبو نسمة ساكن البيت الأبيض ومطالباته المتكررة لـ "النتن ياهو" بعمل هدنة إنسانية لحربه فى غزة.. والنتن راسه وألف سيف إنه يواصل إبادته الجماعية للشعب الفلسطينى..!
بصراحة الحاج أبو نسمة عداه العيب وقزح.. هايعمل إيه الراجل أكتر من كدا مع واحد مفترى جبار مابيعرفش أبوه زى النتن..؟!
فكلنا عارفين إن الولايات المتحدة مكسورة الجناح؛ ومالهاش أى كلمة على النتن؛ وكل اللى تقدر تعمله معاه إنها تحلفه بالعيش والملح وبالست الوالدة إنه يعمل هدنة؛ على الأقل كرامة للراجل البركة الحاج أبو نسمة..!!
فأمريكا ياجماعة طول عمرها شيكا بيكا..!
- أنا مايخشش ذمتى بنكلة الفيلم الهابط اللى ألّفه وأخرجه وكتبه وعمل حواره الإرهابى برخصة نتنياهو حول اقتراح أحد وزرائه، وهو وزير "الطراش".. قصدى "التراث" بضرورة استخدام القنبلة النووية الإسرائيلية ضد سكان غزة..!
فالرسالة اللى عايز يوصلها "النتن ياهو" من ذلك الفيلم الهابط للكل، لبتوع حماس ولكل الدول المجاورة، إن عنده قنابل نووية.. ودا أول اعتراف رسمى إسرائيلى بالمناسبة.. لكنه من كرم أخلاقه وطيبة قلبه وإنسانيته المفرطة مش عايز يستخدمها حتى الآن..!
نعم يا روح طنط..!! دا أنت عملت وبتعمل فى سكان غزة أكتر من اللى بتعمله القنابل النووية.. دى كمية القنابل اللى رمتها على غزة حتى الآن تعادل قوة قنبلتين نوويتين..!
عمومًا العيب على دول العالم "الحر"، اللى واقفة فى ضهرك بترسانتها الحربية لترتكب ما تشاء من جرائم حرب ضد الإنسانية.. فقديما قالوا: "يا فرعون إيش فرعنك.. قال مالقيتش حد يلمنى"..!
- يا جماعة.. أنا خايف أفتح الحنفية ينزل لى منها الزيطة والزمبليطة اللى شغالة اليومين دول حول الهجوم "الأوفر" لبيومي فؤاد على زميله محمد سلام لأنه رفض المشاركة فى مسرحية..!
يا جماعة فضوها سيرة بقى.. والله العظيم إحنا فينا اللى مكفينا.. كفاية مناظر الأطفال اللى بيقتلهم حفدة القردة والخنازير بدم بارد؛ واللى بنشوفها فى كل لحظة صوت وصورة على الهواء مباشرة..
ارحمونا بقى.. الرحمة حلوة..!
- أنا اللى غايظنى إنه حلف بأغلظ الأيمان إنه مش بتاع فلوس..!!
طيب يمين على يمينك يا راجل أنت بالذات بتاع فلوس.. أمال حضرتك رايح ليه..؟! علشان تقضى الفاكانس السنوى بتاع حضرتك وللا رايح من أجل الله والوطن..؟!
بصراحة حكاية إنك مش بتاع فلوس هبت منك قوى وطلعت أوفر يا "سى بيومى أفندى"..!