نفسي أسأل والسؤال بس للأخو ة الأفاضل: هو ليه الصح مال ؟! وأيه معنى نص راجل؟!.
أيوة بتكلم بجد الرجولة النص نص ، مبقتش ليه ليها حد ؟! واللي بيسمع أو يبص، راكن ضميره حتى الغلط فتحوا طريقه ، والتربية الصح التمام بدأت ترفرف لـ الشمال، والكل مبسوط بالكلام والمسخرة هي البطل، أيه اللى جرى في المجتمع ليه اتقلب منه الميزان؟!.
هو احنا عشنا فى منتجع كل اللى فيه قالب جنان، واللا شعار المرحلة أنك تركبلك قرون، علشان تريند المنظرة والشو اللي هيخليك تكون، ياأخوة مالكم صحصحوا فوقوا كده وبلاش لغط، شبابنا بقوا يتحرشوا علني وبيجيبوا الغلط ، على اللي ماشية بشعرها أو بالقصيّر، ويضرب شرفها وعرضها بكلام يحيّر، وعشان يقول إنه دكر يبدأ يشوّه في الحقيقة، وراح كمان قالب الضرر عليها بس بـ١٠٠ طريقة، فتش عليها وشاف صورتها وراح كمان عامل قلق، قال مش ضحية دى فضيحتها في صورتها أهه وع الملأ، والناس بدل ماتحاسبه هو، قالوا الغلط منها بصراحة والهجمة عليها جت بقوة، وبدأ يغلطها بوقاحة ، لكن مفيش واحد كتب وقال له عيب مش من الرجولة ، ولو حصل ده واتقلب على اختك الحلوة المصونة، هتكون ساعتها نص راجل وتقوم تطبل للغلط، واللا هتقل لـ ربع راجل وتسيب سيرتها لِلْلَغط، واللا هتلبس توب رجولة وساعتها بس يقولوا راجل، وتقول له عيب أصل الرجولة مش في الذكورة لو أنت راجل، تعرف تصون العرض كلّه وتشوف بنات الناس دى منك.
خليك راجل بالمعنى كلّه مش نص راجل دي بكرة بنتك، هييجي عليها الدور كمان وتعيش ضحيه لجبان في سنك.