انتهت مباراة النصف النهائي لكرة القدم في دورة الألعاب الأوليمبية المقامة حاليا في باريس، بخسارة المنتخب المصري 6 أهداف مقابل لا شيء من نظيره المغربي.
وكانت تعليقات بعض المشاهير عليها كالتالي:
في البداية كتب الحلفاوي، عبر حسابه الرسمي على تطبيق "X": "بعد الهدفين قلت هنشيل ما كتبتهاش لأن كان عندي أمل أن يخيبوا توقعي .. مبروك لمنتخب المغرب الأولمبي، تستحقون الوقوف على المنصة بكل فخر وما هو أكثر من البرونزية، مبروك للكرة المغربية عمومًا".
وكتب الفنان صلاح عبدالله، عبر حسابه الرسمي على "X": "النهاردة ماجيناش، ورغم الصدمة مبروك يا مغاربة، مذهول ومبلم وحزين بس هنسى، أكيد حننسى، وعلى رأي النجيب المحفوظ، آفة حارتنا النسيان، ومابنتعلمش من أحزانا".
وعلق الفنان هيثم نبيل على الخسارة، كاتبا عبر حسابه بموقع Facebook: "٦ صفر ده سكور يمثل اتحاد الكورة المغربي واتحاد الكورة بمصر .. هما عندهم مشروع شغالين عليه من الناشئين للمنتخب الاول واحنا ربنا كرمنا بالمركز الرابع عشان الجهود الذاتية لشباب منتخبنا اللي اجتهدوا علي قد ما يقدروا، لكن لا يصح الا الصحيح .. عندهم منظومة ناجحة تستحق البرونزية .. مبروك لشباب مصر المركز الرابع حققتوا احسن نتيجة في مناخ غير منظم".
وكتب الملحن عزيز الشافعي عبر حسابه بموقع X: "هو ده المنظر الي كان لازم الكورة المصريه تظهر بيه للأسف
هو ده نتاج المنظومه الكرويه الفاسده و رابطة المصالح و البيزنس
هو ده نتاج اتحاد الكوره الضعيف ولجنة مسابقاته الكارثيه برعاية الحاج !
هو ده نتاج المجاملات و المحسوبيه و تفضيل مصلحة نادي على مصلحة منتخب #مصر
هي دي نتيجة ١٠ او ١٥ شخص هما الي بيخططوا للكورة من ٥٠ سنه
هي دي نتيجة إعلام موجه و لجنة حكام مرتعشة و انعدام المنافسه الشريفه و انعدام اللعب اانظيف
اي مسئول عن الرياضه ف مصر او كرة القدم تحديدا لازم يمشي من مكانه و مايترشحش تاني
انتم ناس فاسدين الا من رحم ربي
و اللي مش فاسد فهو فاشل او ضعيف أو إمعه".
وعبر الإعلامي ابراهيم فايق عن حزنه الشديد لهذه النتيجة، كاتبا عبر حسابه بموقع X: "خسارة كارثية.. فرق واضح في كل حاجة.. احنا ناس بنشتغل اليوم بيومه.. ارزقيه على باب الله.. بنفرح باليومية اللي نخدها وبنكسل نشتغل تاني يوم.. ما هي بتيجي بالجدعنه والفهلوه.. أخطط ليه وارتب ليه واشتغل قبلها بسنين؟!!
دي أقصى حاجة ممكن تتعمل في حالة اللاتخطيط دي.. جهود فردية من اللعيبة أحيانا.. رغبة تزيد وتقل.. نجاح مدرب بشكل أحادي جدا في ظل مقاومة لكل طلباته.. يعني إنت في حالة العبث دي اخدت كل حاجة تقدر تاخدها.
مستحيل تقدر تنافس المنظومة الجماعية اللي عندها خطة وأهداف واضحة وشكل ونشأة معينة بيوصل أعلى رتم فيها في البطولات الكبيرة علشان كده بكل تقدير ببارك للمنتخب المغربي.. حقهم وعن جدارة.
واحنا خلينا واقعيين مش هيبقى معندناش ونتساوى باللي اجتهد ونظم ورتب لنفسه من سنين.. حزين علشان اللاعيبه بتاعة منتخب مصر الأوليمبي دي والجهاز تعبوا جدا وكانوا يستحقوا ختام أفضل بس مستوعب أنهم اشتغلوا في لا منظومة موجودة من زمان بلا أي نظام.. فالعيب مش هيبقى عندهم أبدا".
وكتب الإعلامي رامي رضوان عبر حسابه بموقع X: "منتخب مصر الأوليمبي قدم مباريات جيدة منذ البداية..لكن كنت اتمنى الا يغادر الأوليمبياد بهذه الإهانه!! أسوأ نتيجة في التاريخ الكروي لمنتخبات مصر!!خسارة خسارة خسارة #فضيحة #كارثة".