واصلت الإعلامية أميرة عبيد، هجومها على متصدري التريندات الجوفاء، التي تستهدف هدم قيم وعادات المجتمع، حيث تصدرت فتاة تدعى سندرا صلاح وتطلب الزواج من شاب بدون مهر قائلة: "عايزه بشنطة هدومه".
وقالت أميرة عبيد خلال تقديمها برنامج "هي وهما" على قناة الحدث اليوم،: "زمان كان بيتم الجواز عن طريق الخاطبة، و الخاطبة دي كانت بتكون ست موجودة في المجتمع بتعرف الناس علي بعض بطريقة محترمة تتناسب مع عاداتنا وتقاليدنا، وكانت الخاطبة دي بتوفق راسين في الحلال من خلال موافقة وارتياح المقبلين علي الزواج والأهل والعائلة لبعض ومن هنا بيتم الزواج وكان يُسمى زواج صالونات أو زواج تقليدي وبعد فترة مع ظهور السوشيال ميديا تحول الموضوع من خاطبة لمكتب تعارف و زواج وانتشرت المكاتب دي بشكل كبير جداً علي الفيس بوك وغيرها من المواقع ولكن برضه في العصر الحالي الشباب والبنات مبقوش محتاجين خاطبة ولا مكتب تعارف عشان يلاقوا شريك حياتهم بالعكس احنا بقي عندنا انفتاح كبير وغريب و مخيف بين الشباب والبنات".
تابعت: "ورغم كل ده إلا إن خلال الأيام اللي فاتت انتشرت تريندات جوفاء لبعض البنات اللي بيلبسوا فستان الفرح وينزلوا به الشارع يدوروا علي عريس وطبعاً كلنا عارفين ان ده متاجرة بالفستان الابيض مقابل المشاهدات والشهرة والتريند المتدني .. طيب لما تكون بنت مستقلة ماديا وعندها شقة وعربية وفلوس في البنك وعندها مشروع بيكسبها كويس تطلع تطلب عريس علي الفيس وتقول طالبة عريس بشنطة هدومة ومهري ٢٥ قرش ومش عايزة منه حاجة غير الزواج تفتكروا ده نتيجة ايه ؟! خصوصاً إنها مش ناقصها شيء هل فعلا هي محتاجة عريس أم تبحث عن الشهرة ؟