سارة سعد تكتب: طرق التعبير عن «الحب»

الشيء الوحيد اللي متأكد منه، إن الحب مبيقلِّش، هو بس بيتوه وسط زحمة الحياة، وبتتغيّر طرق التعبير عنُّه حسب ظروف وضغوط كلّ شخص في حياتُه، والشاطر اللي يتقبل ظروف شريكه ويتفهَّم كويس طريقتُه في التعبير عن الحب.

في مرحلة معيّنة، التعبير عن الحبّ بيبقى بكلام حلو، وردة، رسالة أو مكالمة، وفيه مرحلة التعبير فيها لازم يبقى أفعال وخطوات رسميّة تتاخد، ويقل فيها الكلام عادي، لكن مينعدمش، في حين إنّ فيه مرحلة بيبقى أعلى درجات الحب فيها إنك تحسس شريكك بالأمان، وإنَّك مُستحيل تتخلى عنه، وتقوم بواجباتك تجاهه وتوفرله احتياجاته، وبيقل فيها أوي الكلام والأفعال الكبيرة، الشيء الوحيد اللي لازم يوجد في كل مراحل الحب، هو الوفاء، إنك متخونش، وإنك تونسني، أصل الونس هو أساس الحبّ.