التهديد الطايش لـ"الحاج أبو حنان" بتحويل منطقة الشرق الأوسط لجحيم؛ إذا لم يتم الإفراج عن الرهائن لدى حماس قبل 20 يناير القادم؛ بيؤكد إنها هبت خالص من الراعى الرسمى للعصابة الإرهابية التى تحكم إسرائيل..وإن المنطقة بل والعالم كله داخلين، خلال فترة رئاسته القادمة، على أيام سودا مهببة بطين.. أسود من قرن الخروب..!
ربنا يستر
أما "الحاج أبو نسمة فقد أثبت، بعد أن أعفى عن ابنه "هانتر" ابن الشداد، من المحاكمة بتهمة الاحتيال وحيازة أسلحة بأن هناك حرية وعدالة وديمقراطية أمريكية آه.. لكن بالمهلبية والملوخية أم تقلية..لامؤاخذة..!
ماتزعلوش منى..!
أنا كان ممكن أسن سكاكينى وأنزل "تريقة" على أستاذة الاقتصاد المنزلى اللى قالت إن الأسرة محدودة الدخل يكفيها تلتلاف جنيه كفاتورة شهرية للأكل..وكان يمكننى أن أقول إنها عايشة أيام الجنيه الجبس والاتناشر بيضة بمليم؛ لكننى بصراحة شايف إن الست ما غلطتش فى البخارى وعداها العيب وقزح..!
فالدكتورة وفقا لتخصصها، كأستاذة اقتصاد منزلى، عملت"روشتة"، بالتعريفة والسحتوت، لمحدودى الدخل بتقول لهم إزاى ياكلوا أكل صحي..فراخ ولحمة وسمك.. وخضار وفاكهة بالتلتلاف ملطوش شهريا.. وهو بصراحة كلام محترم يجب أن تثاب عليه لا أن تلام عليه..
الست على الأقل بتحترم عقولنا وبتقول كلاما معقولا.. و ماعملتش زى بتوع إعلام "ماقال لى وقلت له ياعوازل فلفلوا" اللى طلعوا كلهم مرة واحدة، وفى نفس واحد، يطالبوا المصريين بأكل أرجل الفراخ لإن كلها بروتين وفيتامين جامد ومتين..!!
"الخابور" العسكرى الملاكى بتاع قناة الفطيرة؛ اللى خرم وداننا بتحليلاته العبيطة عما يحدث فى غزة ؛ شغال اليومين دول هرى وفتى فى المصايب والبلاوى التى ينتظرها السوريون.. وكأن بسلامته جاب التايهة..!
نصيحتى له ياريت ينقطنا بسكاته.. ويشوف لنفسه شغلانة شريفة ياكل منها عيش.. بدلا من هذا المشى البطال..!
إلى المطربة "إياها": ياريت تبطلى تخطبى فى الناس على الفاضى والمليان فى الحفلات اللى بتغنى فيها؛ لإنك بتعكى وبتخبطى فى الحلل.. خليك فى الغناء وبس..!
صحيح إنت صوتك حلو ماننكرش..لكن كلامك دبش وزلط.. وكله غلط..!
ياريت تحطى الحكمة العبقرية الخالدة، حلقة فى ودنك، واللى قالها راجل حكيم، مش فاكر اسمه، قال لا فض فوه ومات حاسدوه : " لولاك يا لسانى ما انصكيت ياقفايا"..!