نشر محمد شبانة ابن عم العندليب عبد الحليم حافظ منشور على حسابه الشخصي على موقع فيسبوك يحتوي على جواب ينفي زواج العندليب عبد الحليم حافظ من السندريلا سعاد حسني .
وتضمن الخطاب المرسل من السندريلا سعاد حسني للعندليب الاسمر عبد الحليم حافظ الاتي :
حبيبى حليم،
"حاولت ان انام حاولت ان انام وانا اقنع نفسي
انك لابد انك ستتصل بي خصوصا بعد. ارجو انك
تخلينى اكلمك كده زى مابتكلم
وصلتني للعربيه بتاعتى نص توصيله كنت فاكره
انك ضرورى حتكلمنى في التليفون اول ماتوصل
بعد ماتكون وصلت مفيد ولكنك لم
تتصل بى ولم تفكر فى
حليم انا لا ادرى ماذا افعل اننى فى قمه العذاب
اننى ابكى وانا نائمه ابكى ليلا نهارا ولا احب
ان ترى دموعى لاننى احبك ولا اريدك تكرهنى
ولماذا تكرهنى بعد ان كنت تحبنى الان
تقول لكل الناس انا لا احبها ولكنى
احبك يا حليم. ماذا افعل قل لى يا حليم
اننى اصبحت حقيقه يا حليم اتعس مخلوقه على وجه الارض".
وقال محمد شبانة في منشور له عبر حسابه الشخصي على موقع التواصل الاجتماعي فيسبوك : عدى على وفاتك يا حليم حوالي نصف قرن والناس لسه بتسأل هل الإشاعة عن جوازك حقيقية ولا لأ؟
يا حليم أنت أعظم واحد غنيت للحب ومن وجهة نظري ده كان بسبب حرمانك منه من أول حب الأم اللي اتحرمت منه يوم ولادتك لحد الحرمان من حب الزوجة والأبناء.
عشان في ناس كتير بتحب تتشهر وخصوصا لما أضواء الشهرة عندها بتقل وتتطفي فيجيبوا سيرتك عشان يرجعوا تاني في دايرة الضوء.
إشاعات كتير طلعت و أنت عايش منها الإشاعات اللي كانت عايزة بتقول أنك بتتدعي المرض علشان تنال تعاطف الجمهور وإن نزيفك علي المسرح كان كذب ولما سافرت في أخر رحلة علاج طلعت الأشاعة اللي بتقول إن حليم بيتدعي أنه مسافر لندن للعلاج وهو بيتفسح ويلف العالم ورجعت بعدها مصر في تابوت وأخرست ألسنة كل اللي كانوا بيقولوا أنك بتمثل وبتتدعي المرض..
وإشاعة الجواز اللي طلعت بعد وفاتك ب ١٧ سنة من ناس المفروض أنهم كانوا أصدقائك وأستمرت الإشاعة بدون أي مستند أو دليل وكان نفسي ألاقي حاجة تنفيها بدليل قاطع.
أنا كنت عارف ومتأكد إنك ماتجوزتش لأنك كنت عايش لأهلك وفنك، ومرضك خلاك تخاف تتجوز وتظلم معاك زوجة وأبناء وكفاية عيلتك إللي عاشوا معاك قساوة مرضك وده اللي أكدتهولي أمي وقبلها جدتي علية الله يرحمهم ويحسن إليهم.
واحنا كأسرة عمرنا ما جرينا ورا تريند أو شهرة زائفة أو تاجرنا بأخبار كاذبة وبنحترم نفسنا وبنحترم جمهورك العريض في العالم كله ومحبيك، وبنلتزم الصمت وبنحاول دايماً نحافظ علي سمعة وسيرة الأسرة الطيبة ولما بنتحدث أو بننفي أي إشاعات أو أخبار لازم يكون معانا دليل أو حاجة تثبت صحة كلامنا للحفاظ علي مصداقية العائلة وحب الناس وأحترامهم لينا يجبرنا أننا منقولش حاجة إلا لو متأكدين منها بنسبة ١٠٠٪..
ورداً علي كل الأكاذيب والإشاعات التي طالت حليم وهو في قبرة بين يديّ الرحمن وطالتنا نحن كعائلة وأرهقتنا وأحزنتنا كثيراً لمدة عقود..
بقالي فترة طويلة بدور علي أي دليل مادي يخرس الألسنة ولكني كنت علي وشك أني أفقد الأمل ولكن مؤخراً قررت أحاول محاولة أخيرة وقررت أنبش في كل الأوراق وفتحت غرفة ملحقة بالمنزل واللي جدتي علية كانت محتفظة فيها بكل "الأوراق والمتعلقات الشخصية وحتي التراث الفني لحليم" وطبعا بما أنك أنت سايب إرث كبير من مقتنيات، جوابات، مستندات وصور وحاجات ممكن أقعد سنين طويلة أدور فيها موصلش لحاجة
ومن يومين بس وأنا بقلب في جواباتك الشخصية وبقراها بتمعن لقيت جواب مرسل لك بخط يد السيدة اللي بعض الأشخاص أشاعوا إنك إتجوزتها.
"سطور قليلة في صفحة واحدة فيها رد على إشاعات بقالها ٣١ سنة والناس بتتكلم عنها لحد النهارده".
هذا الخطاب أرسلته السيدة الفاضلة لحليم بعد أن قرر حليم إنهاء علاقة الحب التي كانت في بدايتها ونحن كعائلة لم ننكر أبداً أنه كان بينهما بداية قصة حب بريئة ومحترمة لم تكتمل وحليم قرر إنهاء تلك العلاقة لأنه لم يكن في أرتياح وأصبحت العلاقة بعد ذلك مجرد علاقة صداقة وزمالة عمل يسودها التقدير والأحترام من الطرفين.
للرد المسبق على كل إللي هيشككوا في هوية صاحبة الجواب، لم يتم نشر الجواب إلا بعد التحقق منه وتقدروا بنفسكم وبكل سهولة تطابقوا خط اليد للأستاذة الفاضلة مع أي جوابات أو رسائل أخري لها بخط يدها.
أنا حقيقي مرتاح وسعيد دلوقتي إن بعد ٣١ سنة قدرت أظهر الحقيقة لجمهورك وأيضاً لجمهور السيدة الفاضلة التي لم تتدعي أبداً طوال حياتها أنها تزوجتك.
ربنا يرحمك يا حليم و يرحمها ويرحم أمواتنا جميعاً...
فهل هذا الجواب يثبت عدم زواج العندليب من السندريلا؟