النتن.. ياهووو.. مجرم الحرب أبو رخصة.. بيجر شكل مصر والدول العربية؛ وبيقول إن احتلاله لها مهمة تاريخية و"روحية"..!
نعم يا روح النونة.."روحية" مين..؟!
روحية دى تبقى خالتك.. لامؤاخذة..!
إيه الهرتلة وقلة القيمة دى..؟!
هو كل وزير أو محافظ عايز يركب الترند وياخد اللقطة.. يطلع يهزأ مرءوسيه قدام الكاميرات ووسائل الإعلام على الهواء مباشرة.. إيه القرف ده..؟!
عملها قبل كده وزير الصحة ووزير التربية والتعليم اللى أهان قيادة محترمة وقاله اسبقنى على مكتبى ومعاك استقالتك.. فطب الراجل من طوله قاطع النفس..!!
وعملها وزير النقل ورفد قيادة من قيادات وزارته على الهواء مباشرة؛ لإن الراجل غلط غلطة عمره وأخد يوم إجازة..!
وعملها أكتر من محافظ.. وآخرهم محافظ المنيا اللى هزأ مدير مدرسة قدام الكاميرات وقدام مصر كلها ومن قبلهم ومن بعدهم تلاميذ الرجل وأسرته.. وياريته هزأه علشان سير العملية التعليمية.. ده هزأه علشانأوضته واسعة وفيها تليفزيون..!!
إيه الخيبة دى..؟!
والله أنا لو من مدير المدرسة كنت قدمت استقالتي للمحافظ على الهواء وأمام الكاميرات اللى حضرته جايبها؛ بعدما أديله درس أخلاقى فى كيفية التعامل مع المرءوسين والمربين الأفاضل.. عمومًا الإحساس نعمة اللى يفقدها يعمى..!!
يا ليلة سودا.. إيه كل مواسير المجارى اللى طفحت مرة واحدة فجأة فى السوشيال ميديا دى..!
خد عندك الست "متيحة حاتم" اللى كانت فى جرة وطلعت لبرا.. عمالة تردح ل مصر كلها وبتقول إحنا أسيادكم.. ياولاد كذا وكذا.. وأخذت تشتم بالأب والأم.. وكلام أبيح مكشوف وخادش للحياء جدًا جدًا عن المؤخرة والمقدمة وما بينهما..!
الست دى أنا عمرى ما ارتحت لها.. وكنت فاكر إن حركاتها الأبيحة وزفارة لسانها مجرد تمثيل فى تمثيل.. لكنها أثبتت بعضمة لسانها إنه حقيقى وده أسلوب حياتها.. وإنها كانت بترضع"....."لامؤاخذة..!
نقول إيه..؟! سبحان العاطى الوهاب بعد الشبشب والقبقاب..!
بالمناسبة أنا ضد إن نقابة الممثلين هى اللى تحاسب "متيحة"؛ فاللى قالته مش اختصاص النقابة.. ده اختصاص النيابة وبوليس الآداب.. لا مؤاخذة..!
أنا مكنش مكشوف عنى الحجاب ولا بضرب الودع؛ لما قلت لكم إن هوجة نقابة الموسيقيين على "مبوسة الساحل" هتخلص على مفيش؛ على طريقة الريس حنفى شيخ الصيادين.. اللى كلمته مبتنزلش الأرض أبدا..!
فنقابة الموسيقيين بتنافس نقابة الممثلين وبتعمل أفلام سيما.. لكنها أفلام هابطة من نوعية "سيما أونطة هاتوا فلوسنا"..!!