=120 مليون تحية للرئيس السيسي لاعتراضه على قانون الإجراءات الجنائية ؛ ورده ل مجلس النواب لتعديله بما يحمى المواطنين ويصون حريتهم؛ ويحقق لهم الأمن والأمان والحفاظ على كرامتهم.
وبدون مبالغة قرار الرئيس يحمل العديد من الرسائل والمعاني؛ التى لا تحتاج إلى شرح .. فرد القانون رسالة قوية للحكومة ولـ مجلس النواب بتصحيح أخطائهما .. ودعوة من رأس الدولة لكل المؤسسات لكى تقوم بدورها فى خدمة الوطن والمواطن.
وبالمناسبة ليست هذه هى المرة الأولى بل هى المرة الثانية، والرابعة فى تاريخ مصر، التى يعترض فيها الرئيس السيسي على القوانين التى تعدها الحكومة ويبصم عليها بالعشرة مجلس النواب رغم كل ما فيها من عوار..!!
عاوز أقول كلام كتير.. لكن كفاية كده حتى لا أغلط فى الحكومة ومجلس النواب.. ومصيبتى السودا إنى ساعة الغلط بأطرطش زلط..!
=واضح إن مطبخنا التشريعى بعافية حبتين؛ فمعظم القوانين التى "تطبخها" الحكومة ويوافق عليها مجلس النواب .. ويبصم عليها بالعشرة.. هدفها الجباية وحلب جيب المواطن فقط بل بعضها يضر أمن المواطن وحريته..!!
إذا كان هناك إصرار على ضرورة وجود "ترزية قوانين" فى الحكومة و مجلس النواب "بيفصلوا تشريعات حسب المقاس".. فياريت يفصلوا القوانين على مقاس الوطن؛ وليس على مقاس الحكومة.. فكل الحكومات زائلة.. لكن الوطن باق..!!
ربنا يجعل كلامنا خفيفا عليها وعليهم.. على الحكومة وعلى ترزية القوانين.. اللهم آمين..!
= شابو لوزير التربية والتعليم اللى رفد طالب ضرب مدرس وقطع هدومه.. وأحال أهل الطالب للنيابة بتهمة اقتحام المدرسة..
هو ده الكلام فاللى مارباهوش الأهالى يربيه الوزير والأيام والليالى..!
=مش عارف ليه الناس اللى هاتخش جهنم حدف مش مصدقين الحاج أبو حنان ساكن البيت الأبيض، اللى عمره ما بينفع فى اليوم الأسود، عندما قال إنه أنهى 7 حروب فى 8 شهور بس..!
يا جماعة الراجل ده لعيب "بلاى إستيشن" ماجابتوش ولادة.. ومش بعيد أبدا إنه ينهى كل الحروب فى ساعة زمن واحدة مش فى تمنشهور..!!
نقول إيه..؟!
أكتر من كده وبيزيح ربنا..!!
=عادى جدا إن أعضاء الجمعية العامة للأمم المتحدة يقاطعوا كلمة النتن ويخرجوا كلهم من القاعة ويسيبوه للكراسى..!
فالكراسى الفاضية هى الوحيدة اللى بتفهم كلامه الفاضى..!
=إصرار بعض المسئولين على رفض الاستقالة رغم الكوارث والأخطاء الجسيمة فى المرافق بيؤكد إن دمهم من فصيلة نادرة جدا هى "إيه. إيه. إم"..!!
وهى اختصار للمصطلح العلمى المعروف بتاع خالتى بمبى: "اللى اختشوا ماتوا"...!!