“اكتشفت إن ابني عنده ١٥ سنة بيشرب ڤيب . اتصدمت. خدت منه الموبايل ، منعته من الخروج، وقطعت عنه المصروف . بس مش حاسة إني مرتاحة… ولا مطمّنة.”
شكوى بتوصلني كتير من أمهات وآباء، سواء الڤيب اللي اصبحت أقرب وأسهل من أي وقت أو السجائر المتاحة في كل مكان .
مراهقين كتير بيقعوا فيهم بدافع الفضول، التقليد، أو الهروب من ضغط داخلي مش عارفين يعبّروا عنه.
رد فعل الأم هنا مفهوم: خوف، غضب، وإحساس بالتهديد.
لكن السؤال الأهم: هل العقاب اللي حصل عالج المشكلة؟ ولا بس خلّى الابن يخاف ويتخفّى؟ العقاب دة ممكن يدينا نتيجة مؤقتة ومش مضمونة.
المراهق في السن ده مش محتاج سجن منزلي، هو محتاج احتواء وحدود في نفس الوقت.
الحرمان الكامل (موبايل – خروج – مصروف) ممكن يوقف السلوك مؤقتًا، لكنه غالبًا:
يزود العناد
يكسر الثقة
يدفعه يعمل اللي عايزه من ورا أهله
رأيي التربوي إن التعامل الصح يبدأ بـ جلسة هادية:
مش تحقيق ولا محاضرة، لكن أسئلة حقيقية:
– عرفت الڤيب إزاي؟
– بتحس بإيه وإنت بتستخدمه؟
– إمتى بتلجأ له؟
بعد الفهم، تيجي الحدود الواضحة:
نعم، في عواقب… بس تكون مرتبطة بالسلوك، ومعلنة مسبقًا، ومؤقتة، ومصحوبة برسالة:
(أنا قلقانة عليك، مش ضدك)
( أنا رافضة السلوك دة )
-كمان مهم نشتغل على البديل:
رياضة، نشاط، صحبة آمنة، مساحة يحس فيها إنه مسموع ومقبول،وقت يقضيه مع العيلة،متابعة من بعيد .
-بدون تجسس او مراقبة
-بدون عنف جسدي او ضرب
-بدون إهانة أدام حد او أصحابه
- فضحه ادام بقية العيلة
في المواقف دي بتوصل رسايل مهمة جدا لولادنا: اهلي ستر وغطا عليا/أهلي بيحبوني وبيحترموني مهما غلطت( دي الوصلات المهم ماتتقطعش في العلاقة معاهم لاي اصلاح سلوكيات مستقبلية)
القضية مش ڤيب وبس.
القضية: إبن بيكبر، وبيجرّب، وبيحتاج أب وأم يكونوا سند مش شرطة.
لأن التربية في المراهقة …مش كسب معركة، لكن كسب إبن في مرحلة الاستكشاف والجرأة وحب المخاطرة .
شاركونا رأيكم:
١- لو كنتِ مكان الأم… هل كنتِ هتختاري العقاب الصارم، ولا الحوار الأول؟ وليه؟
٢- في رأيك، إيه أكتر حاجة ممكن تدفع مراهق في السن ده لتجربة الڤيب: الفضول، ضغط الصحبة، ولا هروب من مشاعر؟
٣- إزاي نقدر نوازن بين الحزم وحماية ولادنا، وبين الاحتواء والحفاظ على الثقة؟