آخر كلام

 فريق "كفتة" من غير طحينة ولا بابا غنوج..!
عاوزين إيه من فريق قال عنه مدربه بعضمة لسانه إنه كله على بعضه إتنين لعيبة وربع..؟!
بل إن الخلوق محمد صلاح زاد من الشعر بيتا مؤكدًا على الملأ أن الفريق، بعد ما لعب فى كأس الأمم الإفريقية، بقى "تلات إرباع" بس..!!
ومنعه أدبه من أن يقول إن الفريق كله تايه ومش عارف راسه من رجليه لأنه بيلعب من غير أى خطة.. ولا يحزنون..!
أنا شخصيًا شايف إن الفريق فعلا تلات أرباع، زى ما قال صلاح، لكن تلات أرباع كفتة وطرب فى ربع رغيف؛ من غير سلطة طحينة ولا حتى بابا غنوج..!
منكم لله..

 يا جماعة.. صدّقونى منتخبنا الوطنى لكرة القدم بحالته دى مع المدير الفنى ده ماينفعش ينافس فى أى بطولة لا كاس عالم ولا حتى كاس العذاب والضنا..!
دا لو لعب فى كاس العالم ها يفضحنا فضيحة اللحمة البتلو فى سوق الجمعة..!
عموما أنا قلتها من زمان إن خطة "بركة دعا الوالدين" اللى بيلعب بها مدرب المنتخب دى ماتجيبش بطولات أبدًا.. دى ما بتجبش غير ضغط وسكر وشلل رعاش والعياذ بالله..!

 ديمقراطية مهلبية بطشة الملوخية..!
عيب قوى إن العالم كله فى أمريكا وأوروبا والهند والسند والبلاد اللى بتركب الأفيال يشنعون على الرئيس ترامب اللطيف الظريف الفرفوش ويتهمونه بالفاشية والديكتاتورية..!
فاشية إيه وديكتاتورية إيه ..؟!
يا جماعة عيب.. دا الراجل قايد صوابعه شمع علشان يخترع لكم ديمقراطية من نوع جديد لنج تاكلوا صوابعكم وراها.. ديمقراطية بالمهلبية وطشة الملوخية.. هاتخلى العالم كله مصارينه سايبة على بعضها..!
وخدوا بقى التقيلة.. ترامب ، بعد ما اخترع النوع الجديد ده، مش محتاج أبدًا لجايزة نوبل؛ دا هاياخد، من غير ترشيح ولا يحزنون، اللى أجمد منها بكتير هاياخد.. "تاج الجزيرة".. مش تاج جزيرة جرينلاند طبعا.. دا تاج الجزيرة بتاع مرزوق العتقى..السلطااااااااانية..!!

 صوت مصر مين اللى بتقولوا لنا ادعوا لها..؟!
أولا.. دى عمرها ما كانت صوت مصر..فصوت مصر لا بتشرب.. ولا بتضرب إيشى أبيض وإيشى بنى.. وبعدين إحنا مش فاضيين ندعى لصوت مصر.. لأننا مشغولين بالدعاء لمصر ذات نفسها إن ربنا يحفظها ويحميها من الوباء والغلاء ومن كيد الأشقاء قبل الأعداء.. اللهم آمين..!

 بتوع "إعلام ما قال لى وقلت له يا عوازل فلفلوا" نازلين طحن فى بعض.. وهاتك ياردح وتلقيح كلام فشر الست أم لالو والست أم تيتى..!!
طوبة على طوبة خللى العركة منصوبة..!