آخر كلام

 جبتك يا عبد المعين..!

بعد ما قالت وزيرة التخطيط إن الحكومة محتاجة فلوس زي ما الناس محتاجة فلوس..!!
أنا شايف إن محدودي الدخل وبتوع المعاشات، اللي بيكحوا تراب، يعملوا جمعية عند الست "أم دقدق".. ويقبضوها الأول.. ويتبرعوا بيها لحكومتنا الغلبانة.. هو دا اللي ناقص..!
 الشعب والحكومة.. مين شغال عند مين..؟!
اللي حارق دمي في كلام وزيرة التخطيط إنها امتداد لسلسلة تصريحات مستفزة لوزراء حاليين وسابقين في حكومة مدبولي بتؤكد نظرتهم المتعالية للشعب.. علي اعتبار أن الحكومة هي ماما وبابا وأنور وجدي..!
كل تلك التصريحات المستفزة للوزراء تجعلنا نتساءل: مين بيشتغل عند مين..؟!
أنا طبعًا مش هاجاوب، كالعادة، علشان ما أغلطش.. ومصيبتي السودا إني ساعة الغلط باطرطش زلط..!
 منين بيودي علي فين..؟!
التحركات الغريبة التي تحدث في العالم الآن تؤكد أن التحالفات التقليدية القديمة كانت موضة وبطلت، وأن هناك تحالفات جديدة لنج حولت أصدقاء الأمس إلي أعداء اليوم.. وبالعكس.. والكل بيهدد بالحرب..!
وبقي الواحد متلخبط ومش عارف راسه من رجليه.. هو رايح ولا جاي.. ومين مع مين.. ومين ضد مين.. ومنين بيودي علي فين..!
يعني زي المطرب عبد الباسط حمودة مابيقول: "أنا مش عارفني أنا تهت مني.. أنا مش أنا.. لا دي ملامحي ولا دا شكلي ولا دا أنا.. أبص لروحي فجأة.. لقيتني تعبت من المفاجأة ونزلت دمعتي.. تكونش دي نهايتي وآخر قصتي"..!!
ربنا يستر.. يا عم عبد الباسط..!
 سكتوا ليه..؟!
أنا قلقان جدًا.. فقد مرت نص ساعة بحالها دون أن نسمع وصلات الردح المتبادلة بين زعماء أوروبا والرئيس الأمريكي.. خير.. اللهم اجعله خير..!
 وأنا أتابع ما تفعله بعض الدول العربية الشقيقة لا أجد ما أقوله إلا أن أدعو الله عز وجل أن يحمي مصر من أشقائها.. أما أعداؤها فهي كفيلة بهم..!
 مصر تستحق عن جدارة تصدّر قائمة أكثر دول العالم إصدارًا للفتاوي..!!
فالكل بيهبد.. وبيفتي.. وجنرالات القهاوي أصبحوا أكتر من الهم علي القلب و"بيفتوا علي روحهم" في كل حاجة: في الدين والكورة والحرب والسلام والسياسة والاقتصاد والتاريخ والجغرافيا.. وكافة شيء..!
أنا دلوقت عرفت ليه الأدوية بتاعة الإسهال اختفت من السوق..!
 بسبوسة التجمع الخامس ..!!
إيه الحكاية ياجماعة.. في أقل من أسبوع واحد.. انهيارات أرضية وانفجار مواسير رئيسية في التجمع الخامس..؟!!
يبدو إن اللي بني مصر كان في الأصل حلواني آه.. لكن اللي بني التجمع كان في الأصل حلواني برضه.. بس تخصص بسبوسة.. لا مؤاخذة..!!