آخر كلام

 قبل ما تقع الفاس في الراس..!

يا عالم ياهووو سايق عليكو النبي ماتسيبوش منافسات كاس العالم وسمعة مصر في إيدين المدير الفني للمنتخب الوطني وحده.. في اختياراته للفريق، اللي هاينافس في البطولة والتي أعلنها منذ أيام، كلها خيار وفاقوس..!
يا جماعة الناس مش طالبين لبن العصفور.. كل اللي طالبينه اختيارات موضوعية للفريق اللي هايمثل مصر.. ومدرب وطني لا يختار اللعيبة ولا يعاملهم حسب الكيف ومزاج حضرته.. ياريت حد يتحرك قبل ما تقع الفاس في الراس؛ ويتفضح فريقنا قدام العالم كله، فضيحة اللحمة البتلو في سوق الجمعة.. ربنا يستر.
 قوانين عطيات وفتكات..!
مش عارف ليه إصرار ترزية القوانين، في كل العصور، علي تفصيل قوانين الأحوال الشخصية بعيدًا عن الشريعة وعلي مقاس أشخاص بعينهم.. وبحجة واحدة لا تتغير: حقوق المرأة.. وفي الآخر نكتشف أن القانون الفلاني معمول علي مقاس الست "سندس"، والقانون العلاني علي مقاس الست عطيات، والقانون الترتاني علي مقاس الست فتكات.. والتعلب فات فات وفي ديله سبع لفات.. أنا حاسس إني بأخبط في الحلل.. ربنا يجعل كلامي خفيفا عليهن: سندس وعطيات والست فتكات..!!
 الأزهر مش الحيطة المايلة..!
ياريت يبطلوا يتطاولوا علي الأزهر.. ف الأزهر ليس الحيطة المايلة في هذا البلد حتي يهاجمه زعيط ومعيط ونطاط الحيط.. كلام قلته من قبل أكثر من مرة.. لكنني أكرره هذه الأيام بالذات؛ لعل التكرار يعلم "الشطار".. أيوه.. مشوها "الشطار" علشان خاطري..!!
 فنكوش الإعلام..!
أنا عاوز واحد درس بتلاتة تعريفة إعلام يقول لنا ما الرسالة التي يحاول "بتوع إعلام ما قال لي وقلت له ياعوازل فلفلوا" توصيلها للناس هذه الأيام..؟!
واحد بيبشر المواطنين إنهم هايحسوا بإنجازات الحكومة عام 2100.. علينا وعليكم خير.. وواحد بيوجه خطابًا غريبًا عجيبًا بيلعب فيه علي وتر الطائفية..
مش عارف إيه الهدف منه في هذا الوقت بالذات؛ الذي نحتاج فيه تلاحم وتكاتف كل أبناء الوطن لمواجهة التحديات المحلية والإقليمية الخطيرة المحيطة بنا..!!
كلها رسائل بلا هدف إلا بلبلة الناس وإحباطهم وبث الفرقة بين أبناء الوطن.. والله العظيم عيب إن ده يبقي حال إعلام مصر؛ رغم وجود وزير للإعلام ورئيس مجلس أعلي للإعلام.. ورئيس هيئة وطنية للإعلام.. لقد قلتها من قبل ورزقي علي الله: المركب اللي فيها ريسين بتغرق..فما بالك بتلاتة..؟!
 راقصة عاوزة تركب الترند فطالبت بإن الزواج يبقي سنتين وبس.. وأهي تجربة.. ياصابت ياخابت.. ناقص تقول نعمل الجواز بالساعة زي تأجير البسكليتات بالضبط.. والمأذون ياخد "شبشب" الزوج رهنا حتي يضمن رجوع "العجلة" في الميعاد..!
واضح أن"الرقاصات" سابوا الدانص.. وهايشتغلوا لنا في الهجص..!
حاجة تقرف بصحيح..!