الكهرباء.. تأديب وتهزيب وإصلاح..!
بصراحة اللى اخترع طريقة حساب استهلاك الكهرباء "إيديه تتلف فى حديد".. ففى أيام الحر اللى ما يعلم بها إلا ربنا عز وجل.. غلطت غلطة عمرى وفتحت جهاز التكييف.. وعينك ماتشوف إلا النور..!
ألف ملطوش عقوبة فورية.. مع زيادة سعر الكيلو إلى حوالى 3جنيهات.. وكان ناقص يحطونى على الخازوق زى ما عملوا مع سليمان الحلبى بعد ما قتل كليبر.. جرى إيه يا حكومة..؟! دا أنا دفعت معاشى كله لبتوع الكهربا.. معاشى اللى هو أقل من مرتب أى فراش فى الحكومة.. رغم خدمتى لقضايا الوطن والمواطن أكتر من نصف قرن..!
يا حكومتنا الرشيدة.. الرحمة حلوة.. هو كله ضرب ضرب.. مفيش شتيمة..!
وبعدين إيه كل هذه العقوبات على مستهلكى الكهربا..؟!
فأى قانون فى الدنيا.. بيمنع معاقبة المجرم على نفس الجريمة مرتين؛ لكن بتوع الكهربا؛ لأنهم فوق القانون، فبيعاقبوا المستهلكين الغلابة مرة واتنين وتلاتة.. وعشرة.. أما مجلس النواب الموقر فهو مش فاضى غير لمناقشة أسباب إنخفاض أسعار البيض..اللى واضح إنه ملا البلد اليومين دول.. لا مؤاخذة..!
إيه القرف ده..؟!
بتوع الإعلام الرياضى، اللى أصبح مهنة من لا مهنة له، عاوزين يكرهونا فى الفوز الوحيد اللى حققناه فى كأس العالم..!
اللى بيقول لك إن تلات إجوان مش كفاية.. دا إحنا كان لازم نفوز بأكتر من كدا لأن نيوزيلندا فريق تعبان..!
واللى يقول لك: إن محمد صلاح راحت عليه، وهناك لعيبة أحرف منه بكتير..!
وحتى الأخ اللى جاب فريق طنطا الأرض، بيقول: إنه حتى لو حسام حسن أخد كأس العالم فهو لا يصلح لأن يكون مدربًا..!!
الناس دى مابتبصش لنفسها فى المراية..؟!
اتلموا بقى وروحوا دوروا لكم على شغلانة شريفة تاكلوا منها عيش بدلاً من هذا المشى البطّال.. لا مؤاخذة..!!
إعلام فرش الملاية..!
اليومين دول بتوع "إعلام ما قال لى وقلت له يا عوازل فلفلوا".. نازلين تقطيع فى هدوم بعض.. وبيعيدوا زمن الردح الجميل بتاع الست أم تيتى والست أم لالو والست أم لطفى اللى بتنور وتطفى..!
سؤالى بتاع كل مرة هو: فين وزير الإعلام وفين رئيس المجلس الأعلى للإعلام وفين رئيس الهيئة الوطنية للإعلام.. أنا بأطمن عليهم مش أكتر.. ربنا يخليهم لمصر..!
الحجاب عامل لهم هسة.. واحد تانى عامل لى فيها روائى ومثقف كبير طالع يهاجم بغضب الحجاب وسنينه واللى لابسينه.. وبيعتبره رجس من عمل الشيطان..!
يا باشا نصيحتى لك.. زى ماقلت الأسبوع اللى فات لصديقك "إياه": احنا فى بلد حر عاوز تلبس الحجاب البسه مش عاوز تلبسه ما تلبسوش..!!
فيها حاجة دى..؟!