كفاية أفورة..!
بعد ماكرمهــم الرئيس ومنحهــم أعلــى الأوسمة.. واحتفلت بهم الجماهير العريضة..إيه لزمته بقى كل يوم احتفال وتكريم جديد من كل من هب ودب حتى وصلت للمطاعم ؛ومش ناقص غير محلات الكشرى وعربيات الفول والطعمية.. فضوها سيرة بقى.. الحكاية زادت وفاضت ومصخت قوى على قولة إخواننا الصعايدة.. فما زاد عن حده انقلب لضده..!
عودة الوزير الفاشل..!
وزير ثقافة سابق فاشل؛ كان بيؤكد دايما إن عدد الملحدين فى مصر بيزيد والحمد لله؛ بدأ يعود للأضواء.. أملا فى ركوب الكرسى من جديد.. سايق عليكو النبى بلاش ترجعوا لنا الوشوش المحروقة دى.. البلد مش ناقصة.. والمرارة قربت تتفقع.. والإستبن بالشىء الفلانى، وتايوانى مضروب كمان..!!
والله العظيم هزلت..!
عشنا وشفنا التشكيك فى أحكام قضاء مصر الشامخ على الهواء مباشرة من "بتوع إعلام ماقال لى وقلت له ياعوازل فلفلوا"..!
والأكادة أنه بعد ما انتفض القضاة ليردوا العدوان على نزاهتهم وعدالتهم.. وجدنا من يقول: "سورى ماكانش قصدى"..!
طبعا الكلام دا هايجيب لى وجع الدماغ؛ واللجان إياها هاتشتغل علىّ ومش بعيد يخرجونى من الملة ؛ على أساس إنى مش واقف مع زمايلى الصحفيين اللى شككوا فى أحكام القضاء..!
يا جماعة.. إذا كنتم عاوزين الحق مش ابن عمه.. قضاء مصر هو الملاذ الأخير لكل مواطن فى هذا البلد.. ولا يجب أن نسكت على إهانته أو التشكيك فى عدالته ونزاهته من زعيط ومعيط ونطاط الحيط.
هذه كلمتى لوجه الله والوطن؛ وهو دا الحقاللى أعرفه عز المعرفة.. أما إبن عمه فمعرفوش وموش عاوز أعرفه..!!
المواطن عبد المأمور..!
بعد ما قال وزير المالية المحترم أحمد كجوك: "إحنا شغالين عند الشعب".. رد عليه مأمور ضرايب "خايب" قائلا: إحنا مابنشتغلش عند حد..!
وكأن حضرة المأمور بيفكرنا بأن المواطن "عبد المأمور".. مأمور الضرايب طبعًا..!
ياريت حضراتكم تردوا عليه بس سايق عليكو النبى بلاش شتيمة بالأب والأم..!
الحجاب فرض على الرجالة بس..!!
آخر افتكاسات الأخ "الضلالى" هى أن الحجاب فرض على الرجالة مش الستات..!
وقال إنه زمان كان الرجل عارى الرأس منبوذا من أهله وعشيرته..!
يا سلام على الكلام.. بس ياريت حضرتك تبقى قدوتنا وتلبس الحجاب.. وبكدا تبقى مدام" سعدية".. أختنا الكبيرة..!!
آباء آخر زمن..!
تخيلوا أب جاحد يدى إبنه ضناه ربعمية مليون جنيه بس..؟!
بصراحة.. الإبن المتربى الأصيل له حق يجرجر أبوه للمحاكم ويرفع عليه قضية حجر بسبب هذا المبلغ التافه..!
دا الواحد بيخش السوبر ماركت بالربعمية مليون جنيه وبيخرج بربع براميلى ونص حــلاوة وعشـــر بيضــات.. و"ملبســاية".. بقية الحساب..!!