كتب: إبراهيم شرع الله
أثارت فتاة مواقع السوشيال ميديا بحالة من الكوميديا والغضب فى وقت واحد، بعد نشر قصة انفصالها عن خطيبها الذي تركها بإحدى قاعات الأفراح، ورحل بعد أخذه "التورتة"، وخلال ساعات قليلة أصبحت السوشيال ميديا كلها تسخر من مصطفى أبو تورتة ، عبر مواقع التواصل الاجتماعي ليزيح أخيرًا عبارة "كلهم مصطفى أبو حجر" من قاموس الفتيات ويحل محلها إفيه "كلهم مصطفى ابو تورتة".
وكانت الفتاه قد كتبت قصتها قائلة: أنا كان مقري فتحتي زي ما كله عارف على مصطفى وخطبتي كانت يوم السبت، اللي فات المفروض كان بينا مشاكل زي أي اتنين عاديين مع مامته بقى وخلافات بتحصل أول ما أطلب حاجة وقولت دا عادي بيحصل بس اللي متخيلتش إنه يحصل إنه يسيبني في القاعة لوحدي.. اتفاجئت إنه مش عازم صحابه ولا قرايبه كلهم وحسيت في حاجة غلط حتى مامته وأخته مفيش.. واحدة فيهم جت باركتلي وقولت أمشي اليوم”.
وأضافت: كل ما أقوله فين الشبكه اللي هنلبسها يقوللي أصل اتكب عليها شربات أصل وقع جاتوه عليها.. طب خليها بعد البوفية وكلام كله غريب كدا لحد ما دخلنا بعد البوفية لقيت أهله كلهم مشيوا.. وقال إيه خالوا تعب! فيقوم أهله كلهم يمشوا وأنا في القاعة لوحدي بدور عليه الاقيه بيصرخ برا ويقول خالي عيان وبيلطم وحاجات غريبة كدا وأنا اقسم بالله ما مستوعبة اللي بيحصل هو في واحد خاله عيان عيلته كلها بتمشي الستات اختفوا بس كانو بيهزروا فوق نسوا العيان”.
وتابعت: "والأنيل إننا اكتشفنا إنهم أخدوا التورت معاهم طب مش خالك عيان.. أخدتوا التورت معاكم ملبستنيش شبكة.. وقبل كل دا بأيام جالي البيت وأخد التوينز بتاعت قراية الفاتحة بحجة إنه عايز يلبسني كله مرة واحدة في القاعة وأنا هبلة وافقت مجاش في بالي للحظة واحدة انه هيعمل فيا كدا".
وواصلت الفتاة بقلب: دلوقتى حبه أقول كل دا عشان ايه؟ كان ممكن ننهي بالمعروف من غير أذى نفسي ليا.. كان ممكن تسترجل وتيجي تقولي يلا نفركش وكنت لغيت الخطوبة.. مش جي وبترقص وتقولي محضرلك مفاجأة.. وفي نيتك تعمل فيا كدا.. حسبي الله ونعم الوكيل".
وجاءت التعليقات علي مواقع السوشيال ميديا غاضبة متعاطفة مع الفتاة.
وقام رواد ومستخدمو التواصل الاجتماعي بنشر كوميكس عن الواقعة وأطلقوا عليه بسخرية اسم "مصطفي أبو تورتة".
وجاء ضمن التعليقات على منشورها، وقالت إحدى مستخدمات مواقع التواصل الاجتماعي قائلة "متبطليش تقولى غير حسبى الله ونعم الوكيل ..
-مصطفي تورته يهز جبال.. بس انت غني وقول موال.
- بكرة يقعد يتفرج على أخته وعلى حيحصلها !
-كلنا بندعي عليك يامصطفي ابو تورتة.
-الشباب مبقاش ليهم أمان.. كلكم مصطفي ابو تورته.
