كتب: مدحت سالم
وقعت الفنانة السورية سارة نخلة ضحية لقرصة نملة، ونقلت على أثرها إلى المستشفى، واصفة حالتها: "كنت بموت من الوجع".
ونشرت سارة نخلة صورة لها وهى ترقد على سرير فى المستشفى من خلال حسابها الشخصى على موقع الصور والفيديوهات "إنستجرام" .
وعلقت نخلة على الصورة قائلة :"أنا أول مرة بعمل الحركة دي ولا عمري حبيت حد يشوفني تعبانة أو ضعيفة بس الحوار غريب شوية او شويتين الحقيقة، دي كانت ليلتي في المستشفى بعد ما روحت البيت بعدين حسيت بوجع رهيب روحت المستشفى وعملت نقدر نقول نصف عمليه عشان التخدير كان موضعي عشان مش عارفة استحمل الألم بس غير أننا كان عندي برد أصلا و بقالي أربع أيام مش باكل كويس ومش بنام كويس و كل شوية بدوخ بس السبب إلي دخلني المستشفى بالليل و بكل بساطة هو نملة ، صدقوني نملة".
وتابعت: "تخيلوا لما تبقوا طول الوقت بتحاولوا تبقوا أقوى و كويسين و تيجوا على نفسكوا و في الآخر نملة تدخلكو العمليات".
وواصلت: "ببساطة نملة قرصتني عملت التهاب بعدين خراج وكل دا أنا فاكرة أنها ناموسة عادية عشان أنا جسمي حساس جدا بس وصلت لدرجة بالليل إني مش عارفة أقعد دقيقة من الوجع والسخونية والدوخة ودخلت الطوارئ على طول والدكتور فتح الخراج طبعا كنت بموت من الوجع بس الحمدلله عدت على خير، الحمدلله على كل حال وأنا في بيتي دلوقتي بس يارب أبقى أحسن والجرح يلم بسرعة عشان أقدر أوقف تاني ".
جدير بالذكر أن سارة خاضت السباق الرمضانى الماضي بمسلسل "حكايتي"، والمسلسل بطولة ياسمين صبري ووفاء عامر وأحمد بدير، أحمد صلاح حسنى، جمال سليمان، إدوارد، تأليف محمد عبدالمعطى، إخراج أحمد سمير فرج.
