بقلم - محسن حسنين
× يا ليلة بمبى..!! خط لنقل النفط بين الإمارات وإسرائيل من الممكن أن ينقل النفط الخليجى إلى أوروبا؛ ويؤثر على قناة السويس، كما قال رئيس هيئة القناة..!!
واضح إن اللعب ضد مصر خلاص بقى
على المكشوف..!!
× مش عارف ليه الحكومة مدوخة الناس السبع دوخات علشان يسجلوا عقاراتهم ..؟!!
فإحنا عارفين والحكومة ،من قبلنا طبعا، إن تسجيل أى عقار إذا كان فيه فايدة واحدة للمواطن، وهى إثبات ملكيته وحمايتها، فإن له عشرات الفوايد للحكومة أبسطها حصر الثروة العقارية، وزيادة موارد الخزانة العامة، وخفض العجز المزمن فى الموازنة؛ وترسيخ أسس العدالة الاجتماعية.. إلى غير ذلك من الفوائد..
يعنى الحكومة مستفيدة من الحكاية فى الأول وفى الآخر؛ حتى لو جعلت التسجيل ببلاش..!
الرحمة يا حكومة..!!
× حد يحل لى الفزورة العويصة دى: إزاى فاتورة المواطن بتخش لها على أكتر من ألف وألفين جنيه فى الشهر؛ ووزير الكهرباء، لافض فوه ومات حاسدوه، بيقول إن فاتورة كهرباء منزله لا تزيد على 350 جنيها فقط..؟!!!
قدامك 3 إجابات إختر واحدة منهم: هل لأنه وزير الكهرباء..؟ أم لأنه وزير الكهرباء..؟
أو لأنه وزير الكهرباء..!!
أنا شخصيا عندى إجابة رابعة مختلفة تماما عن الإجابات التلاتة هى: عشان حضرته وزير الكهرباء...!!
× بيقولوا إن ترامب مبسوط من وباء كورونا؛ لإنه سيتجنب السلام بالإيد على أشخاص مقززين..!!
يا جماعة حد يفهم الحاج أبو حنان غلطه..دا إحنا عندنا المرشحين لمجلس النواب بيبوسوا الناخبين من بقهم تحت شعار: «كورونا كورونا بس على الحصانة لايمونا»..!!
× يا جماعة دى إسمها إذاعة «القرآن الكريم».. يعنى عايزين نسمع القرآن بالقراءات المختلفة والتفسير.. مش نسمع برامج وحكايات وروايات ولتّ وعجن لا يودى ولا يجيب..!
× مش عارف الناس زعلانة ليه لأن مدير أمن واخد صورة تذكارية مع الممثل «إياه» وكأنه واقف مع صلاح الدين الأيوبى..؟!!
يا جماعة هو دا ممثل عادى.. دا أسطورة و«نمبر وان».. يكفى إنه أحسن واحد بيرقص بالسيف وهو «عريان بلبوص»..!!
صلاح الدين الأيوبى نفسه ماقدرش يعملها..!
× أنا مش مصدق حكاية الراجل اللى عمل عملية لفرخة رجلها إنكسرت بسبعتلاف جنيه..!