ألفت شعر «حلمنتيشى»، لا يمت للواقع بصلة، أتحدث فيه بلسان مواطن غلبان، من بلد تاني، «بيحب» حكومته، اللى فى بلد تانى خالص غير مصر، بعد أن رفعت له أسعار الكهربا و البنزين باأقول فيهم:
يا حكومتنا الرشيدة سعيدة ومليون سعيدة خفى إيديكى علينا بقينا ع الحديدة
فى جمهوريتنا الجديدة الجباية مش شطارة إحنا بقى إستوينا والعبارة فى الشيكارة
أنا وحياة غلاوتك مش عايز علاوتك
خديها حلال عليك وفوقيها كمان حلاوتك
با أدعيلك من كل قلبى وشاهد علىّ ربى
باأدعيلك بالسلامة وتلبسى «البيجامة»..!!
مرة تانية بأكد إن هذا الشعر خيالى، ولا يمت للواقع بصلة، وليس مقصودا به حكومة الدكتور مدبولى ، وأى تشابه فى الأسماء أو الأحداث هو من قبيل الصدفة البحتة اللى هى خير من ألف ميعاد..!!
الفيديو الأخير للأخ «إيمان» مفيهوش ريحة الإيمان ..!
كلام أبيح بيستعرض فيه مهاراته كـ «إسكندرانى» فى الشهيق والزفير.. و«الشخير».. أى والله الشخير..!
وهو هنا ماشى على خطى «جده»، اللى غنى لحبيبته: «شفتى بتاكلنى أنا فى عرضك خليها تسلم على خدك»..!!
نقول إيه..؟! من شابه جده فما ظلم.. فالعرق بيمد لسابع جد..!!
الناس فى مصر ناسيين خالص إن فى وباء قاتل اسمه كورونا، لذلك يتزاحمون بالهبل على الشواطئ وفى المتنزهات، وعايشين حياتهم بالطول وبالعرض.. آخر انبساط وزبادى فى الخلاط..!!
فكرونى بنكتة بلدينا اللى نزل الترعة يستحمى فالبلهارسيا راحت تحلل..!!
واضح إن مدير الكرة بنادى بيراميدز سمعه تقيل حبتين، لأنه لم يسمع حتى الآن عن فضيلة اسمها الروح الرياضية..!!
فقد فرض «بسلامته» غرامة 100 ألف جنيه على لاعبه شريف إكرامى لقيامه بتهنئة النادى الأهلى بفوزه بدورى أبطال إفريقيا للمرة العاشرة..؟!
سلوك مشين قد نقبله من «مدير مراجيح مولد النبي»، لكننا لا نقبله أبدا من رياضى مخضرم بدرجة مدير كرة..!!
بصراحة عيب قوى أن يتم تكريم بطلة العالم فى الأسكواش نور الشربينى «على الضيق».. على مستوى ناديها فقط..!
«نور» يجب أن تكرم على مستوى مصر كلها.. فهى بنت مصر التى رفعت راس مصر.