متزعلوش منى.. ده فريق مينفعش يلعب باسم مصر..!!
وكيروش وجهازه الفنى لازم ياخدوا «استمارة سكة».. فلا خطة ولا لعب ولا فن ولا هندسة..!
فاللعيبة تايهة فى الملعب من أول دقيقة وحتى آخر دقيقة فى كأس العرب.. والأجوان كانت بتيجى حسب التساهيل دون أى تخطيط.. وكل مباراة برزقها..!!
والخطة الوحيدة التى لعب بها الفريق هى خطة «بركة دعا الوالدين»، وهى خطة يمكن أن يلعب بها فريق الأسد المرعب فى كأس دوران شبرا.. لكنها لا تصلح أبدا للعب بها فى أى بطولة دولية لامؤاخذة..!!
يا ريت ميطلعش حد يقول لنا إنه يكفينا «التمثيل المشرف»، ولازم نحافظ على الفريق وما نخسروش بسبب خسارة بطولة.. وياريت ندى فرصة للجهاز الفنى.. والجايات أكتر من الرايحات.. والكلام إياه اللى ميتشبعش منه..!!
لو عايزين الحق مش ابن عمه.. لازم نجيب مدرب عنده فكر ورؤية.. والفريق لازم تضاف إليه عناصر جديدة جديرة باللعب باسم مصر؛ خاصة ونحن على أعتاب أهم بطولتين.. كأس الأمم الإفريقية بالكاميرون، وكأس العالم فى قطر.
هو ده الحق اللى أعرفه.. أما ابن عمه فما أعرفوش ومش عايز أعرفه..!!
إيه التفاهة دى..؟! واحدة هبت فى دماغها تحلق راسها «زلبطة».. وواحد على أعتاب الثمانين من عمره طلق مراته.. إحنا مالنا الإعلام الهىء والمىء والدريبىء.. خلاص كل مشاكلنا انتهت ولم يبق إلا شعر بسلامتها وجواز وطلاق بسلامته..؟!
أقسم بالله أن هذا الإعلام لا يليق ب مصر ولا بشعب مصر.. ده إعلام بيضيع يا وديع..!!
وبعدين بالعقل كده لو كل اتنين متجوزين زعلانين من بعض هيحلقوا شعرهم.. البلد كلها هتمشى فى الشارع «زلبطة».. لا مؤاخذة..!!
مليون تحية لنواب الشعب الذين رفضوا محاولات الحكومة لفرض المزيد من الضرائب على الناس.
الرحمة حلوة يا حكومة هنلاقيها من الضرائب ولّا من كورونا ولّا من التجار الجشعين اللى مولعين أسعار كل شىء حتى المش والجعضيض.. وطبعا مش هقول لكم يعنى إيه «مش» على اعتبار إنكم عارفين يعنى إيه «جعضيض»..!!
مهما منحتم نجوم القبح، اللى مبيعرفوش الألف من كوز الدرة، سيوف دهب وسيارات بالملايين ودرجات دكتوراة فخرية فلن يصبح الغراب طاووسا.. ولن تقنع البقرة أبدًا أن الكباب ألذ من البرسيم.. !!