ياااااه.. أخيرًا اعترف حمد بن جاسم، نائب رئيس وزراء قطر السابق، بعضمة لسانه، بأن الأمريكان اكتشفوا، بعد ما رتب لقاء بينهم وبين مرسي، ضحالة فكر مرسي والإخوان، وإنهم ليست لديهم خطة لإدارة البلاد؛ وإنهم لا يصلحون حتى لإدارة دكان مش دولة كبيرة عريقة بحجم مصر..!!
وهو بالمناسبة نفس ما قلته فى مقالات عديدة فى مجلة أكتوبر فى عام 2012، فى عز قوة الإخوان، بعد أن اغتصب مرسي والجماعة كرسي الرئاسة؛ وقلت إنهم يقومون بـ"التكويش" وأخونة كل شيء.. الرئاسة والبرلمان والصحافة، وأنهم لم يكن لديهم أي سياسات للتطبيق فانتهجوا نفس سياسات "الحزن" الوطنى.. وقلت إن الأهل والعشيرة حولوا حفل تنصيب مرسى لوليمة فتة ولحمة ورز بالخل والتوم..!!
إذا كان الفرق بين "الفاجر" والتاجر حرفا واحدا.. فإن بعض تجار مصرنا المحروسة، اللى هايخشوا جهنم حدفا، ألغوا هذا الفرق وتحول التاجر إلى فاجر؛ بعد أن رفع أسعار كل شيء وأي شيء حتى المش والجعضيض..!!
وكالعادة مش هاأقول لكم يعنى إيه مش على اعتبار إنكم عارفين طبعا يعنى إيه "جعضيض"..؟!!
الصديقة الدكتورة نجوى كامل أستاذة الصحافة المعروفة بتسأل بكل براءة: إيه العلاقة بين الحرب الروسية الأوكرانية وارتفاع سعر الفرخة فى العمرانية..؟!!
وأرد فأقول لحضرتها: هي بالضبط زي العلاقة بين المهلبية وطشة الملوخية..!!
الصديق محمد العزبي، مدير عام توزيع الأهرام، قال لي: أنا ماعنديش مشكلة إن التجار يرفعوا سعر البيضة إلى جنيهين بالتمام والكمال.. لكن أموت وأعرف إزاى "قدروا" يصغروها لغاية مابقت قد البلية..؟!!
وأرد وأقول له: بعض التجار "يقدروا" يعملوا كافة شيء؛ فالتاجر فى مصر مش فاجر وبس.. دا فاجر و"قادر" كمان..!!
صديقى الكاتب الكبير على القماش يسأل وزير التموين وبراءة الأطفال فى عينيه: هل "لو" انتهت الحرب الروسية الأوكرانية هاترجع أسعار العيش والمكرونة والزيت كما كانت..؟!
وطبعا لأن الوزير مش فاضى يرد؛ لأن معاليه شغال تصريحات هنا وهناك لإشعال الأسعار أكتر وأكتر وتخويف المصريين.. فالعبد لله مضطر يرد ويقول:
يا على بيه أولا "لو" بتفتح عمل الشيطان.. ثانيا الست أم كلثوم قالتها حكمة من زماااااان: عايزنا نرجع زى زمان قول للزمان ارجع يا زمان..!!
صديقى الشاعر الكبير عادل سلامة بيقول: العيب مش على التجار والمستوردين والمنتجين اللى ولعوا الأسعار.. العيب على أجهزة حماية المستهلك والرقابة على الأسواق النايمة على روحها..؟!!
وسؤالى لحضرته هو: إيه ده.. هو إحنا عندنا أجهزة لحماية المستهلك.. وأجهزة للرقابة على الأسواق..؟! ناقص تقول لى إن عندنا جهاز لمنع الاحتكار كمان..؟!!
قرار الاتحاد الدولى للقطط بمنع قطط روسيا من الاشتراك فى المسابقات الدولية ضربة معلم بصحيح..!!
يستاهلوا.. علشان القطة المشمشية تبطل تبقى شقية.. وتبطل تنط النطة وتبرشط على النملية..!!