ميرهان حسين تنشر صورها بالحجاب.. وتعلق «كل من عليها فان»

شاركت الفنانة ميرهان حسين جمهورها ومتابعيها على حسابها الرسمى بموقع "إنستجرام" عدة صور لها بالحجاب خلال أدائها مناسك العمرة

وظهرت ميرهان، فى الصور من أمام الكعبة المشرفة داخل المسجد الحرام بمكة المكرمة، وعلقت عليها قائلة: "مع أن الصورة دى من أحب صورى لقلبى اترددت أنزلها، أولا خفت أن دا يأثر على ثواب حاجة بينى وبين رب العالمين، ثانيا عارفة أن فى ناس سطحية كتير هايكتبوا كومنتات كلها إيه يا طاهرة.. إيه يا ست الشيخة ويعملوا فيها أنهم مابيغلطوش أبدا وجايين يحكموا على ناس زيهم أحكام هبلة وخلاص وهما مايعرفوش اللى بينك وبين ربنا ولا عمرهم هايعرفوه".

وتابعت: "قولت لأ مش هامشى ورا الفكر دا وهنزل صورتى اللى بحبها عشان فيها ذكرى وجودى فى أطهر بقاع الأرض وأنا ضيفة فى بيت الله الحرام وبحتفل فيها بنعمة من أكبر النعم هى نعمة أن ليا رب عظيم اسمه الكريم، اللى ممكن أطلب منه أى شئ ومفيش حاجة كبيرة عليه إنما أمره إذا أراد شيئا أن يقول له كن فايكون".

وأضافت: "نعمة وجود ربنا فحياتنا أكبر من كل النعم، أنا حقيقى معرفش إزاى فى ناس بتلحد وتنكر وجود ربنا والعياذ بالله، وفى منهم أصحاب ليا وناس بقابلهم ومع حبى ليهم بس بقولهم فايتكوا أعظم حاجة فى الوجود أن يبقى ليك رب قادر على تحقيق كل اللى يتمناه قلبك ويسرح فيه خيالك.. رب أكبر من كل كبير هو الأمان فى الدنيا دى.. وكل من عليها فان.

ميرهان حسين، يعرض لها حاليا على قناة ON مسلسل "نقل عام"، من بطولة الفنان محمود حميدة، سوسن بدر، سميحة أيوب، أحمد بدير، دينا، محمد محمود عبد العزيز، تأليف وليد خيرى، وإخراج عادل أديب.