أعلنت الفنانة زيزي عادل، اعتزالها الغناء، من خلال مقطع فيديو نشرته عبر حسابها بموقع الرسمي بموقع تبادل الصور والڤيديوهات القصيرة "الإنستجرام"، مساء أمس الاثنين 18 أبريل لعام 2022.
وفي هذا التقرير نوضح أبرز المعلومات عن زيزي عادل:
- زيزي عادل من مواليد 26 أكتوبر 1987
- بدأت حياتها المهنية عقب تخرجها من معهد الموسيقى العربية.
- تعلمت على آلتي البيانو والقانون خلال دراستها بمعهد الموسيقى العربية.
- كانت بدايتها الفنية مع برنامج المسابقات "ستار أكاديمي 2" عام 2004.
- انضمت إلى شركة "روتانا" وأصدرت أول ألبوماتها بعنوان "واحدة طيبة" عام 2007
- أصدرت ألبومها الثاني "وعد عليا" عام 2009.
- قامت بتصوير العديد من الأغاني المصورة التي لاقت استحسان الجمهور منها "حب مش محسوب عليا"، "وعد عليا"، و"واحدة تانية" التي حققت نجاحا كبيرا وهي من ألحان تامر عاشور.
- قامت بتلحين عدد من أغانيها بنفسها.
- آخر أغاني زيزي عادل أغنية "الرجالة" والتي طرحتها في عيد الحب عام 2019.
- آخر حفلاتها الغنائية كانت بتاريخ 29 أغسطس 2019، حيث أحيت حفلا ضمن فعاليات الدورة 28 من مهرجان القلعة الدولي للموسيقى والغناء على مسرح محكى القلعة
سبب اعتزال زيزي عادل:
أعلن زيزي عادل اعتزالها الفن قائلة: "أنا طالعة أقول خبر مهم جدا أخدته في حياتي، ويمكن يكون أهم خبر خدته في حياتي، هو قرار الاعتزال، قررت أسيب المهنة اللي أنا بشتغلها".
أضافت زيزي عادل: «يمكن القرار ده ما أخدتهوش إمبارح يعني، أخدته من فترة كبيرة، أنا مطلعتش أقولكم الخبر ده، لإني كنت حابة أتكلم مع نفسي ومع الناس القريبة مني جدا، والناس دي دعمتني جدا لما قولتلهم القرار ده، وشجعوني جدا إني أعمل كده، أنا ببعد عن أكتر حاجة من أكتر المغريات في الدنيا، اللي هى الشهرة، وهبعد عن الشهرة والأضواء والفنانين، اللي هى الناس بتقرب منها».
تابعت: «الفترة اللي فاتت قربت من ربنا جدا، ولقيت القرآن بيقولي إني لازم أكون ملتزمة، لازم على قد ما أقدر أكون ملتزمة، ويمكن تكونوا مستغربين، إني طالعة بشعري ومش محجبة، ده لإن ربنا لسه ما أنعمش عليا بخطوة الحجاب، وبدعي ربنا إني ألبس الحجاب، وكل حاجة بتيجي خطوة خطوة، مفيش حاجة بتيجي مرة واحدة، فأنا خدت خطوة وإن شاء الله تيجي الخطوة اللي بعدها».
واصلت زيزي عادل: «عايز أقولكم كمان إني بالنسبة للفن هو مصدر دخلي، أنا سبت حاجة بعيش منها، ولكن أنا سبت ده وعارفة إن ربنا هيرزقني، ربنا مبينساش حد، فسايبه ده على ربنا، ومعنديش مشكلة، بالعكس راضية جدا على القرار اللي أنا أخدته ومبسوطة بيه جدا، وحابه اللي جاي من حياتي، ويمكن بعد ما أخدت القرار ده، تعرضت لمواقف اختبار من ربنا، ولما سألت أهل العلم أفتوني بكده، وكنت محطوطة تحت ضغط أوافق أو ما أوافقش، والاختبار كان بالنسبالي صعب شوية، خصوصا إن البني آدم ضعيف، ويمكن العرض اللي جالي مجاليش وأنا بمارس المهنة، والحمد لله قدرت أقف بدعم من الناس اللي حواليا».
وقالت زيزي عادل: «مش عايزه أخش في حتة الفن حلال والفن حرام، عشان مبقاش طالعة بتكلم كإني داعية، أنا طالعة أتكلم كزيزي، وطالعة أقول إني بطلت أغني، لإني مش صح، وديني بيقول كده، وأنا حابة إني أموت وربنا راضي عني، وكلنا نتمنى حاجة زي دي، وعايزة لما أموت أكون مستعدة لمقابلة ربنا، وأكون راضية عن نفسي وعن حياتي وعن شخصي وعن أفعالي، والحمد لله التزمت، وقربت من ربنا طبعا بطريقة كويسة، وربنا يكرم والتزم أكتر وأكتر، وعايزاكم تدعولي ربنا يثبتني».