كشف الفنان تامر حسني عن سعادته باستعانة طلبة الجامعات بأعماله ضمن مشاريع تخرجهم.
ونشر تامر حسني عبر حسابه على Instagram فيديو للطلبة بعد انتهاء عرض مشروعهم، حيث ظهر في الخلفية، شاشة تعرض لقطات لمجموعة من الأطفال، صاحبتها أغنية "الموضوع فيك".
وكتب تامر معلقا: " فرحة عمري لما شباب عظيم من شباب مصر الواعد يستوحي مشروع تخرجه أو يقتدي بأغنيه ليا زي الموضوع فيك أو مش تمثال أو قد التحدي".
وأضاف تامر حسني: " والله والله وأنا بعمل الأغاني دي كانت دي نيتي أنها تتحس ويتعمل بيها مش تتسمع بس، والحمدلله اللي طلبته من ربنا حصل، عشان اللي بيطلع من القلب بيوصل للقلب".
وتابع: "مبروك شباب مصر العظيم ، يارب حياة جديدة كلها خير ونجاح وطموح لا ينقطع، ربنا يفرح أهاليكم بيكم، أنتوا أملنا وأنتوا النماذج المشرفة الحقيقية".
وأوضح تامر حسني: "الحقيقة اتطلب مني كلمة أقولها للشباب اللي بيتخرجوا، بس أنا كدا كدا كنت هكتب لكل شبابنا مش اللي بيتخرج بس بكتب لينا كلنا، اكتروا وخلوا أيديكم في أيد بعض، هفضل أقولها مفيش حل غير أنك تنجح، لما بتنجح كل الناس بتقدرك واللي مكانش فاهمك ومصدقك بيصدقك و بيحترمك، لما بتنجح بتبقى قوي ومرغوب فيك، لما بتنجح ربنا بيحبك وبيستخدمك عشان تنفع غيرك".
وأكمل: "يا شباب يا جميل متبخلوش على بعض بالنصيحة والكلمة الطيبة وفعل الخير، أي فكر شرير مهما كان كتير لازم يلاقي قصاده فكر خير أكبر وأكتر عشان ننهض ببلدنا و نسلمها لأولادنا أحسن من ما كانت في زمننا، هي دي رسالتنا كبشر، وكل حد فينا مادام بيصحى من النوم بيلاقي نفسه لسه عايش لازم يعرف أنه لسه مطلوب منه مهام في الدنيا لازم يعملها ويفرح أن ربنا مديله وقت وعمر يحقق فيه".
وأردف تامر حسني: "ومهما كانت الصعاب أنت لازم تبقى بطل قصة حياتك، عمركم سمعتوا عن بطل معندوش معاناة؟ مستحيل. المعاناة دي اللي هتصنع منك راجل قد المسئولية، وهتبقى بسببها بطل في قصة حياتك، ومش عيب تبدأ من الصفر ياما ناس بدأت من تحت الصفر، ووصلوا لأكتر من أحلامهم، أنتوا كمان هتوصلوا".
وأنهى تامر حسني نصائحه للشباب قائلا: " ثقوا في نفسكوا وخلوا يقينكم بالله أقوى شيء، صراع الدنيا صراع يقيني، صدق نفسك أنت تقدر وأنتي تقدري، يعلم ربنا أنا بحبكوا قد أيه ونفسي أشوف شباب الوطن كله ناجح و فرحان ومفرح أهله، مبروك يا امل مصر".