وجه الشيخ خالد الجندي الداعية الإسلامي، رسالة قوية للمواطنين بعد تحرك سعر الدولار أمام الجنيه: "اوعى تربط اللى في جيبك بأسعار السوق، أوعى تتخيل إن اللى بيرزقك هو الجنيه اللى في جيبك".
وأكد الجندى "اوعى تتخيل أننا نرزق عن طريق وزير أو أمير أو سلطان، على الإطلاق، ولكن الله هو الرزاق ذو القوة المتين".
وأضاف الجندى: "الرزق لا يحمى إلا بالقوة ولا يتأتى للعبد محميا إلا بالقوة، علشان كده أقول نربط العملة لا بالين ولا بالدولار ولا بالليرة ولا بالين ولكن نربطها بتعلقك بالله ولو ربطنا العملة بتعلقنا بالله سعر العملة هيختلف بعامل مكاتب الصرافة متعرفهوش، فيه عملة مكاتب الصرافة متعرفهاش والبنوك مسمعتش عنها ولا يتم صكها في مجامع صك العملة ومنعرمش نكتبها بالشيك وليست قابلة للتداول، وتيجي مصروفة لكل واحد بس وتغير قيمة المال اللى في جيبك، وهي قل تداولها في الأسواق وقل من يتعامل بها والكثيرون اغفلوها من حساباتهم أثناء مراقبتهم لسعر الدولار واخبار سعر الجنيه الذهب، هي عملة البركة وهو اسم عزيز علينا جدا".
وأوضح الداعية الإسلامى: "احنا مش بننصب علي الناس بإسم البركة، ومش بنلم فلوس من حد، والنبي صلي الله عليه وسلم قلنا معادلة حسابية غريبة ولو كان الحديث ده النهاردة كانوا طلعوا علي السوشيال ميديا وهاجموه، قالنا النبي طعام الواحد يكفى الاثنين وطعام الاثنين يكفى الثلاثة وطعام الثلاثة يكفى الأربعة، وهذا كلام سيدنا رسول الله أي بعامل البركة هنلاقى الأكل يكفى والفلوس مكفية وربنا سترها ازاي دي مش شغلتنا، وعلي فكرة 90% من الشعب تقريبا عايش بعامل البركة مش بحقيقة المال، ورئيس الدولة نفسه بيقولك صراحة أن لا يمكن لواحد يعيش في حالة مستقرة الا لو دخله 10 آلاف جنيه شهريا واحنا دخلنا أقل من ذلك إذن فهو عامل البركة".