- بصراحة الهرى الكتير عن حقوق المرأة وتمكين المرأة كلمة حق يراد بها باطل..!!
فالحكاية زادت وفاضت و«مصخت» على قولة إخواننا الصعايدة..!
فالمرأة عندنا واخدة حقها تالت ومتلت؛ فلا فرق ولا تمييز بينها وبين الراجل فى أى حاجة.. فهى تخدم بلدها فى كل المواقع.. فهى مهندسة وطبيبة ومعلمة وصحفية وأستاذة جامعة ومديرة ووزيرة.
دا إحنا حتى فى بيوتنا بنسمى الزوجة «الحكومة»؛ لأنها الكل فى الكل.. فهى عمود البيت.. وشايلة همومنا ومشاكلنا؛ وقايدة صوابعها العشرة شمع لكل العيلة..!
فطول النهار بنقول: الحكومة راحت.. الحكومة جت.. الحكومة طبخت.. الحكومة غسلت.. الحكومة نفضت ومسحت.. الحكومة رضعت العيال .. الحكومة غيرت لهم اللفف..!
لكن يا ويله وسواد ليله اللى يلعب بديله مع الحكومة.. هنا بقى ينقلب الحال غير الحال: الحكومة زعلت.. الحكومة عينيها بتطق شرار.. الحكومة سنت السواطير.. الحكومة قطعت.. الحكومة عبت فى الأكياس..!!
إدعوا معايا فى الأيام المفترجة دى إن ربنا عز وجل يكفينا شر الحكومة وسواطير الحكومة.. ويجعل كلامنا خفيفا عليها..!
-الحاج أبو حنان، الساكن السابق للبيت الأبيض اللى مابينفعش فى اليوم الأسود، بيطالب إسرائيل بإنها تخلص الحرب بسرعة.. تبيد الفلسطينيين وتدمر المبانى «كتيمى» من غير ما تعلن ولا تذيع فيديوهات لعدم إثارة الرأى العام العالمى..!
يا فرحة إبليس بيك يا حاج أبو حنان.. فالفكر ده فكر أبالسة ولاد شياطين..!
-بالمناسبة عادى جدا إن منتخبنا لكرة القدم يتفضح فضيحة اللحمة البتلو فى سوق الجمعة ونتائجه زى الزفت..!
فالمدير الفنى للمنتخب كل يوم يعمل له حكاية ورواية عن بعض لعيبة المنتخب.. آخرها كلامه عن محمد صلاح ؛ وإن «شيكابالا» لا يقل عنه فى الموهبة والحرفنة.. إلى آخر ذلك من الكلام الخايب اللى قاله..!
يا عم سايق عليك النبى ركز فى شغلك.. وبلاش الكلام الخايب ده؛ لإنه بيخلق ضغائن وفتن بين اللعيبة وهم ما يتلم.. ونهاية السكة دى ممكن تدمر المنتخب للأبد..!
يعنى من الآخر.. إلعب دورك كمدير فنى لمنتخب مصر وبس.. وبلاش تلعب دور «خالتى اللتاتة» اللى ما يعجبها العجب ولا الصيام فى رجب..!
-خناقة حامية الوطيس شغالة الآن بين أعضاء بـ مجلس الشيوخ الامريكى من عدة ولايات حول البطاطس.. أى والله البطاطس.. وهل هى من الخضروات ولّا من الحبوب..!
يا خرابى على اللطافة..!!
فكرونى بسيد بنجر اللى غير اسمه وخللاه علي بنجر.. فهو فى الآخر بنجر ابن بنجر..!