الناس زعلانة من اللي كتبته عن وزير التربية والتعليم..!
ناس بتقول إن خطة تطوير التعليم التي أعلنها الوزير مش بتاعته.. دي خطة الدولة وكانت معدة سلفا من قبل أن يتولي الوزارة..!
وناس بتقول: إن الخطة عبارة عن سلق بيض، سلق بيض دي من عندي ، فإزاي خطة لتطوير التعليم في مصر.. أكبر دولة في المنطقة، يحطها وزير .
لم يتول المسئولية إلا من شهرين فقط..؟!
بالإضافة إلي تساؤلات طويلة عريضة عن المواد الدراسية التي ألغيت والمواد التي أبقيت..!
وأنا طبعًا معنديش إجابة عن كل هذه التساؤلات.. لذلك علي وزيرنا الهمام أن يرد لنا علي كل هذا الكلام..!!
عيب أوي إن مصر صاحبة حضارة الخمستلاف سنة تبقي خطبة الجمعة فيها موحدة في كل المساجد من أسوان لراس التين..!
والغريبة إن اللي بيختار موضوعات الخطبة كان شاطر أوي في "الإنشا" في المرحلة الابتدائية.. فكل خطبة أنقح من التانية.. وهي صالحة بامتياز للنشر في مجلات الحائط المدرسية..!
مرة يعمل خطبة عن أهمية المياه في حياتنا ومرة عن أهمية البركة.. مش عارف عن إيه.. موضوعات مدرسية مملة ورتيبة لا يستفيد منها أحد..!
لذلك اتصلت بصديقي الشيخ أسامة فخري، وكيل وزارة الأوقاف والمسئول عن المساجد في مصر؛ وطلبت منه تغيير هذا الوضع الغريب الذي لا يليق بمصر؛ واقترحت عليه بدلا من فرض خطبة جمعة واحدة علي كل المساجد أن تقترح الوزارة ثلاث قضايا تتناسب مع اهتمامات الناس.. يختار من بينها كل إمام مسجد موضوع خطبته..
وقد وعدني بعرض اقتراحي علي وزير الأوقاف الشيخ أسامة الأزهري.
يعني من الآخر كده الكرة الآن في ملعب الوزير..ياريت يلعبها صح..!
إيه الحكاية..؟!
مش عارف ليه الطلاب بيتعاملوا مع حفلات التخرج في الجامعات وكأنها زفة بلدي أو حنة بنت خالتهم "متيحة"..!
رقص ودانس ومسخرة.. وبوس وأحضان.. وصلت إلي حد إن طالب بيبوس ويحضن طالبة زميلته ويرفعها من علي الأرض؛ وهي بترقص فرحانة والضحكة في وشها فدان علي أنغام أغنية مسفة من بتوع مهرجانات اليومين دول..!
إزاي الجامعات تسمح بهذه المساخر والمهازل..؟!
صحيح.. الولاد والبنات لازم يفرحوا بالتخرج.. لكن مش بالقوي كده..!
زي ما توقعت.. فرحنا بميدالية "إبن الجندي"..ونسينا بلاوي بعثتنا لأولمبياد باريس.. ونسينا سوء الإعداد.. والإخفاقات.. وأموال الشعب التي أهدرت.. وراحت خالتي عند خالتك واتفرقوا الخالات..!
عموما ده عادي في المعادي.. أنا بقالي نصف قرن صحافة علي الحال ده.. بأنفخ في قربة مقطوعة..!