يا جماعة الخير أنتم بتنفخوا فى قربة مقطوعة.. فالرد على الأفنديات والهوانم اللى بيطالبوا بتحليل "المساكنة" مش مسئولية شيوخنا الأفاضل.. دا مسئولية بوليس الآداب..!!
فالدعوة للفسق والفجور ونشر الرذيلة والزنا لا يتم الرد عليها بالحكمة والموعظة الحسنة.. بل بالبوليس والقضاء.. والســجن.. علشان الأفنديات والهوانم بتوع المساكنة يشوفوا "المساكنة" على أصولها..!
بالمناسبة.. أنا زعلان من شيوخنا الأفاضل فى جامعة الأزهر و دار الإفتاء اللى سموا "الكلام الفارغ"، اللى قاله دكتور بالجامعة، بإباحة سرقة التيار الكهربائى والمياه والغاز.."فتوى"..!
دى يا جماعة مش فتوى.. دا تحريض سافر على السرقة والنصب مع سبق الإصرار والترصد..ولذلك التحقيق معاه مش مهمة الجامعة.. دى مهمة المباحث والنيابة.. لامؤاخذة..!
مليون تحية لمعالى المستشار الجليل عدنان فنجرى وزير العدل ؛ الذى أمر، فور أن إتصلت به على تليفونه الخاص، ببحث مشكلة أسباب إعاقة تسجيل وحدتى السكنية الصغيرة بالساحل الطيب بالشهر العقارى لمدة تزيد على ثلاثة شهور رغم سلامة كل مستنداتى وأوراقى..
كما بادر معاليه بالإتصال بى للتأكد من إرسالى للشكوى على تليفونه الخاص.
لقد أثبت معالى مستشارنا الجليل أنه وزير مسئول بدرجة إنسان.
إيه الحكاية..؟!
فنص الممثلين والممثلات اللى مش لاقيين شغل طالعين يشحتوا بطريقة فجة.. والنص التانى لبسوا العمة والكاكولا وتقمصوا شخصية مولانا الشيخ كفتة ابن طرب.. وهاتك يافتى فى الدين بهبل وعبط..!
دول مابقوش من القوة "الناعمة".. بالميم.. دول بقوا من القوة "الناعقة".. بالقاف.. لامؤاخذة..!
واحد من بتوع إعلام "ما قال لى وقلت له يا عوازل فلفلوا ".. بيطلب من المواطنين الغلابة إنهم يبوسوا إيديهم "شعر ودقن".. آسف قصدى "وش وضهر".. لأنهم الشعب الوحيد فى العالم اللى يمكنه شراء ألف رغيف عيش بدولار واحد..!
عايز أرد على حضرته.. بس خايف أغلط فى حضرته.. وأنا مصيبتى السودا إنى ساعة الغلط بأطرطش زلط..!
هو الفجر، بضم الفاء، وصل للدرجة دى..؟!
فواحد عبيط من بتوع المهرجانات، اللى مابيفكش الخط، بيقول إنه بيشرب خمرة وبيسكر طينة.. وده عادى جدًا لأن مفيش حد فى مصر مابيشربش خمرة..!
دا ناقص إن بسلامته يقول إن الكونياك "مشروب البنت المهذبة".. بصوت الممثل الراحل إستيفان روستى فى فيلم "حب ودموع"..!