كشفت الكاتبة الصحفية مها نور وصاحبة مبادرة "ذراعي خط أحمر" الخاصة بمرض السرطان، عن إصابة الفنانة سميحة أيوب بمرض السرطان ومعاناتها معه لمدة 20 عاما، وكتبت مها على صفحتها على الفيس بوك:
"سميحة أيوب.. سيدة المسرح العربي اصرت على اخفاء وجـعها عن عيون الناس عشرين سنه مع السـرطان الملـعون
من ثلاث سنوات ، شوفتها في المسرح القومي في قاعة كبار الزوار لفت نظري ساعتها ان ذراعها متورم سألت وقتها صديقه لي فنانه كانت قاعده جنبي قولتلها هي مدام سميحة عندها كانسر؟؟
قالتلي بقوه لا طبعا..... قولتلها بس شكل ذراعها بيوحي انها مصابه ردت عليا تاني بتاكيد لاااااا....
احنا طول عمرنا من زمان بنمثل معاها وهي ذراعها كده معندهاش حاجه
ومرت سنه وكنت بتفرج على مسلسل ليها ولاحظت ان ذراعها واضح جدا في الشاشه وبداء يحصل في تورم اكتر من اخر مره شوفتها وبما اني في الاساس رئيس تحرير مجلة وكاتبة صحفيه وكنت رئيس تحرير لعدد من البرامج التلفزيونية فاده خلى عندي لسته كبيره لارقام فنانين كتير
دورت على الرقم وقررت ابعت لها رساله لطيفه توحي باني عرفت ان عندها كانسر بدون مااقول الكلمه صريحه حسبان اني ممكن يكون احساسي غلط وحاولت اوضح لها اني انا كمان زيها اتفجأت بردها عليا بسرعه جدا وبكلمات لطيفه وكلها حب واحتساب اكدت لي انها فعلا مصابة
وطلبت مني انها تشوفني وفعلا حددنا الموعد ورحت لها بيتها في الزمالك الضهر الساعه ١٢ كانت شقه دوبلكس دورين فتحتلي المساعده بتاعتها ودخلت حجرة خاصه بيها يبدو انها المكان المريح بالنسبه لها لان كان فيها كل احتياجاتها وكان بجوارها جهاز للمفوديما صغير ومكتبه فيها كتب وصور وكنبه وفوتيات قعدت هي على الكنبه وانا على شمالها على الفوتي اول ما شوفتها كنت خايفه حاسه برهبه كبيره كنت متخيلة انها ست شديده قاسيه مغروره لكن لما اتكلمت ورحبت بيا وخدتني في حضنها اطمنت وبدات احس براحة والتخشيبه اللي في جسمي بدأت تهدى وتفك ولما بدأنا الكلام حسيت انها عكس تماما ماكنت متخيلة خااااالص
ست طيبة جدا هاديه حنونه تحس انها ام بجد برغم ان اول مره اشوفها حسيت براحة وحب اول كلمه قالتهالي اول مادخلت عليا ( الله انت اموره وصغنونه) كنت جايبه معايا اسوره ذراعي خط احمر عملتهلها من الفضه
وقعدنا تقريبا ساعتين ويمكن اكتر تحكيلي ازاي اكتشفت المرض من سنين كتير وهي مسافره اسكندريه وانها اتعالجت ودخلت المستشفى هناك ولكن اتفاجات بعدم معرفتها اطلاقا بمشكله ذراعها واستغربت برغم انها واعيه ومثقفه ولكن معندهاش علم ولا حتى دكتورها وعاها ازاي تحافظ عليه كل اللي في دماغها ان في جهاز جنبها لما ذراعها يوجها تحطه عليه وبس وكانت بتسمع كلامي عن مشكله الذراع باستغراب جدا
سألتها ساعتها ازي بتعرفي تلبسي الهدوم لان ذراعك متورم جدا قالتلي اي هدوم بجيبها بوديها للترزي يقص الكم ويزوده عشان يناسب حجم ايدي
حكينا كتير وضحكنا ومن كتر ما اللقاء كان جميل ومريح وكله حميمية نسيت اطلب اني اتصور معاها او اتكسفت واكتفيت بحضنها وكلمتها الحلوه اللي رفعت من روحي المعنويه وقتها (الله انت اموره وصغننه )
…وداعا سيدة المسرح العربي
ودعنا سيده ماحبتش تتاجر بوجعها
سيده فضلت تواجه السرطـان في صمت بعيد عن عيون الناس لكن ذراعها اللي ازاح الستار عن السر اللي كانت مخبياه
ربنا يرحمك يا ست الكل، ويجعل تعبك في ميزان حسناتك، احبناكي كما عهدناكي سيدة صابرة محتسبه قويه امام عدو لدود"
يشار إلى أن الفنانة سميحة أيوب توفت اول امس الثلاثاء عن عمر يناهز ٩٣ عاما، وتقام مراسم العزاء اليوم بمسجد عمر مكرم.