يخرب بيت كدا..!! الطابور الخامس شغال على ودنه، تحت سمع وبصر الجميع دون أن يحرك أى أحد ساكنا، لهدم كيان الدولة المصرية، ودعم أفكار عبيطة لتقزيم دور مصر الرائد والقائد فى المنطقة والعالم.
والمصيبة إنهم شالوا برقع الحيا وبيظهروا جهارا نهارا فى كل وسائل الإعلام بوصفهم خبراء إستراتيجيين وأسماؤهم تسبقها "دال نقطة"..لزوم النصب والضحك على دقون المصريين..!
أسماؤهم مصرية وأفكارهم صهيونية..!
دول لايمكن يكونوا مصريين أبدًا شربوا من نيلها وفكروا يغنوا لها.. دول نبت شيطانى لا دين له ولا ملة إلا الدولار والدينار والريال.. دول أكيد مارضعوش من خيرها.. دول رضعوا من زبالتها.. لامؤاخذة..!!
الهرى اللى شغال اليومين دول على السوشيال ميديا، والذى تثيره لجان معروفة، لترشيح فلان لرئاسة الحكومة وعلان لرئاسة مش عارف إيه.. كل دا هرى فاضى ها يودى البلد فى ستين داهية..!
أنا قلتها من حوالى أربع سنوات، فى نفس هذا المكان: حكومة مدبولى لم تعد تصلح لهذه المرحلة التاريخية العصيبة..
إحنا محتاجين النهاردة قبل بكـــرة "حكومة أزمة" لمواجهة المخاطر المتلتلة والتحديات الاقتصادية والأمنية والسياسية التى تحيط بنا من كل جانب على كل الأصعدة المحلية والإقليمية والدولية؛ والتى يتسبب بها الأشقاء قبل الأعداء..
أما ما يطالب به البعض من تغييرات شكلية لبعض الوزراء؛ على طريقة "شالوا ألدو وجابوا شاهين".. فهذا لن يحل شيئا..بل قد يزيد الأزمات تفاقما..!
أقولها ورزقى ورزقكم على الله.. وربنا يجعل كلامنا خفيفا عليهم..!!
عاوز أقول كلمتين واقفين فى زورى للبعض اللى دفعوا للحاج أبو حنان، باليمين وبالشمال، كتيرة تريليونات الدولارات عربونا "للمحبة والصداقة"؛ ومش لأى حاجة تانية خالص لاسمح الله: الحاج أبو حنان يا جماعة الخير مالوش صاحب..وأكبر مثال على ذلك ما فعله بصديقه إيلون ماسك اللى دفع دم قلبه لمساندة حملته الانتخابية..!!
دا يقول له: يا شمام يا سبرسجى يا بتاع المخدرات.. والتانى يقوله: أسكت يا بتاع فضيحة أبستين.. وإذا كنتو نسيتو اللى جرى هاتوا الدفاتر تنقرا..!
وطبعا أبو حنان قرصته والقبر.. فبدأ فى تدمير إمبراطورية ماسك.. وبيفكر يطرده برا أمريكا وحواديت وحكايات أكيد كلكم متابعينها..
نصيحتى الذهبية للأشقاء كل الأشقاء: البيت الأبيض عمره مابينفع فى اليوم الأسود.. والأيام بيننا..!!
بالمناسبة.. نصيحتى برضه لنفس الأشقاء، للأسف، اللى بيخططوا لتهديد أمن مصر القومى، وتقزيم دورها الإقليمى: لاتبصق فى بئر ستشرب منها.. والله العظيم ستشرب منها.. وبرضه الأيام بيننا..!!