إعلام "ماقاللي وقلت له ياعوازل فلفلوا" فيه حاجة محيراني..!
فهل تتصور يا مؤمن إن قناة فضائية تابعة لدولة عربية تحمل اسم مصر ينتقد مذيعوها كل يوم؛ بل يهاجمون بعنف، كل كبيرة وصغيرة في مصر.. بل وأي مسئول مصري كبير كان أو صغير ..؟!!
طيب هاأبسطها لكم.. هل نتخيل، ولو في الأحلام، أن تسمح أي دولة عربية لمصر بعمل قناة تحمل اسم هذه الدولة العربية؛ وتنتقد أوضاعها الداخلية وتؤلب عليها مواطنيها بصورة فجة يوميا..؟!
طبعًا أنا هاسيب الإجابة للمسئولين عن إعلام ما قال لي وقلت له ياعوازل فلفلوا..لأن إجابتي أنا صعبة حبتين.. لأنها قد تخدش الحياء العام..!!
واضح أن وزير التموين راجل طيب وعلي نياته.. فقد أعلن صراحة إن الحكومة لا تستطيع أن تجبر أي تاجر علي خفض الأسعار .. وهو كلام جميل وكلام معقول ماأقدرش أقول حاجة عنه، علي قولة المطربة ليلي مراد ..!
لكن الوزير نسي أو تناسي إن ما يفعله التُجّار بالسوق هو احتكار؛ وأن هناك جهازًا طويلاً عريضًا اسمه جهاز حماية المنافسة ومنع الاحتكار مهمته محاسبة ومعاقبة المحتكرين؛ فلماذا لا تلجأ إليه الحكومة لضبط السوق وردع المحتكرين..؟!
هي حاجة من إتنين: إما أن الجهاز نايم في سابع نومة والحكومة مكسوفة تقلق منامه..أو أن الجهاز كله راح في الوبا زي ماراحت هنادي يا أمااااي..!
أنا شايف إن الجهاز راح في الوبا وهو نايم في سابع نومة..!
أنا عندي فكرة بمليون جنيه.. ليه الحكومة ماتعملش قعدة عرب مع ممثلي التجار وتوزع علي كل واحد منهم رغيف عيش من بتاع بطاقات التموين علشان يحلف بالنعمة علي عينيه أنه مش هايرفع الأسعار..؟!
المشكلة هنا مش في التجار اللي هايرجعوا في كلامهم بالتأكيد.. لكن المشكلة في رغيف عيش التموين اللي لا ينفع يتاكل.. ولا ينفع حتي يتحلف عليه..!
زي ما توقعت من أسبوعين إن أزمة "مبوسة" حفلة الساحل هاتنتهي علي طريقة الريس حنفي شيخ الصيادين؛ اللي كلمته مابتنزلش الأرض أبدًا..!!
وتوتة توتة خلصت الحدوتة؛ واللي يحب العريس والعروسة ما يضربش نار.. وسمعني يا جدع سلام نشرة الأخبار..!!
آه يا دماغي..!!
راقصة من إياهم بتؤكد إنها مابترقصش في أي كباريهات بيشربوا فيها خمور لأنها حرام..!
يا سلام علي التقوي.. اللهم قوي إيمانك يا طاهرة..!
فكرتني بنكتة الخمورجي اللي بيشرب الخمرة بإيده اليمين؛ لأن الشرب بالإيد الشمال.. حرام..!!