إيه الهبل دا..؟!
إزاى واحد مرتشى محكوم عليه بالمؤبد يختاروه رئيسا لحى شرق الإسكندرية ..؟!
فين التحريات.. فين صحيفة الحالة الجنائية.. فين السراية الصفرا لإنى هاأتجنن من الهبل اللى بيحصل دا..؟!
هى حاجة من إتنين.. إما إن اللى اختاره عارف تاريخه الأسود ومع ذلك عينه.. أو إنهم عملوا عنه تحريات لكن عن طريق "الإدارة العامة لمباحث مراجيح مولد النبى"..!!
"أبى أحمق"، مجرم الحرب أبو رخصة، سايق الهبالة على الشيطنة وبينفى تمامًا أى صلة له بالفيضان الصناعى اللى تسبب فيه سد النهضة اللى أغرق السودان وأجزاء من مصر.. وبيحاول يطرمخ على جريمته بحكايات واتهامات لمصر..
فكرنى بالمثل إياه اللى بيقول "اللى مش عارف مين تلهيك.. وتجيب اللى فيها فيك"..!
إيه اللى عمله رئيس مجلس النواب ده مع وزير العدل..؟!
فما حدث الأسبوع الماضى لم تكن محاولة لإحراج الوزير؛ بل محاولة لتوريطه..!
يعنى إيه يلح فى سؤال الوزير: إنت ليه تراجعت عن اعتراضاتك على التعديلات التى طلبها رئيس الجمهورية على قانون الإجراءات الجنائية..؟!
دا مش سؤال.. دا فخ.. وبيسميها المصرى الظريف أبو دم خفيف " زومبة"..!
ومش عاوز أقول أكتر من كدا حتى لا أغلط.. ومصيبتى السودا إنى ساعة الغلط باأطرطش زلط..!
وبعدين نروح بعيد ليه..؟!
دا رئيس مجلس النواب ذات نفسه عمل أكتر من كدا عندما عرض قانون الإيجارات على المجلس.. فقد اعترض شكلا وموضوعا على القانون؛ وقال خطبة نارية عن ضرورة مراعاة مصالح الشعب الذى أقسم على رعايتها.
لكننا فوجئنا جميعا بعد ساعات قليلة برئيس المجلس يتراجع عن كل ماقاله ويوافق على القانون..!!
تم ذلك دون أن يحرجه أى أحد ويلح فى سؤاله: لماذا تراجعت فجأة عن اعتراضاتك النارية.. وأين ذهبت مصالح الشعب التى أقسمت على رعايتها..؟!
نصيحتى لرئيس مجلس النواب: "لا تنظر للقشة فى عين أخيك لكن أنظر للخشبة التى فى عينك"..!
هم يضحك وهم يبكى..!
ممثلة وشها يقطع الخميرة من البيت.. كل شوية تطلع لنا بحكاية ورواية عن مؤخرتها ومقدمتها وما بينهما أملا فى ركوب الترند ..!
آخر افتكاساتها أنها أطلقت على نفسها لقب"الأنثى نمبر ون".. بأمارة إيه مش عارف..؟!!
فكرتنى بالست إياها، اللى وشها يقطع الخميرة من البيت برضه، اللى قالت إن جوزها ألف فيها خمسمية قصيدة؛ وإنها الخالق الناطق زبيدة ثروت..!!
اللى مجننى إنها لحد دلوقت مجاوبتش على سؤالى: هى زبيدة بنت مين بالضبط.. زبيدة بنت الطحاوى وللا زبيدة بنت أبو جليل..!!