ارحمونا.. الرحمة حلوة..!
فى كل انتخابات من أيام الرئيس مبارك وحتى الآن بينشروا صورا تحرق الدم..!!
مرة صورة لواحد خارج من المستشفى خلصان شايلينه هيلا بيلا على نقالة ومعلقين له محاليل قال إيه..؟! علشان يدلى بصوته..!!
ومرة تانية صورة لعريس وعروسة سايبين شهر العسل وشابكين إيديهم فى إيدين بعض ورايحين يدلوا بصوتهم "يوم الصباحية"..!
والأكادة إن العروسة لسه بفستان الفرح والعريس بالبدلة كاملة.. والمأذون والمعازيم ماشيين وراهم ومعاهم الدى جى مشغل أغنية: "طلى بالأبيض طلى يازهرة نيسان..طلى يا حلوة وهلى بها الوجه الريان"..!!
يا جماعة ارحمونا والله مرارتنا هاتتفقع خلاص.. كفاية أفلام هابطة بقى.. الرحمة حلوة..!!
إيه الهرتلة دى..؟!
إزاى يسكتوا على شركات الزيوت اللى قررت كلها فى وقت واحد رفع الأسعار بحجة إن أرباحها بقت حاجة ببلاش كدا..؟!
يا عالم ياهووووو دا إسمه اتفاق احتكارى بيعاقب عليه القانون..
فين الحكومة..؟ فين الأجهزة الرقابية..؟! فين جهاز حماية المنافسة ومنع الاحتكار.. هو لسه موجود وللا راح فى الوبا زى ماراحت هنادى ياأماااااى..؟!
عموما أنا شايف إن وجود الجهاز زى عدمه..وشايف إنهم من باب الأمانة وتسمية الأشياء بمسمياتها.. يغيروا اسمه ويخلوه "جهاز منع المنافسة وحماية الاحتكار"..!
فشغلانته بقت بالضبط زى شغلانة اسماعيل ياسين على المدفع..... برووروووم..!!
كفاية حرقة دم بقى..!
كل شوية المذيع "إياه" يطلع يقول لنا اللى مرتبه الشهرى أقل من خمستاشر ألف جنيه مايعرفش يعيش فى البلد دى..!
يا ليلة سودا.. دا أنا مش عايش خالص..!
أنا خايف أقول لكم معاشى كام بعد خمسين سنة خدمة فى ثانوى.. آسف قصدى فى بلاط صاحبة الجلالة.. لأنى متأكد أنكم مش هاتطيقوا تبصوا فى وشى بعد كدا..!
كفاية إنى أقول لكم.. إنى لما بأحط كارت المعاش فى "الإيه تى إم" بيطلع لى واحد من الماكنة بيتف فى وشى..!!
بذمتكم فيه قلة قيمة أكتر من كدا..؟!
بعد وصلات الردح المتبادلة اليومين دول بين ساكن البيت الأبيض ونانسى بيلوسى رئيسة مجلس النواب الأمريكى السابقة..انفعل فاعل خير فشل فى فض الاشتباك بين إتنين ستات فى حوش بردق بيردحوا لبعض بأقذر الألفاظ والشتائم.. قائلا لهما بزهق: يا ستات عيب فضوها سيرة بقى.. أنتم فضحتونا.. خليتوا إيه لنانسى والحاج أبو حنان..!
نصيحتى لإدارة النادى الأهلى: ياريت تضموا الكابتن بن شرقى لفريق كرة.."اليد"..هايجيب لكم أجوان بالهبل.. زى الجون اللى جابو فى الزمالك فى ماتش السوبر..!!