محسن حسنين يكتب: آخر كلام

× أحب الشهور إلى قلبى شهر رمضان المبارك.. وأبغض الشهور إلى عقلى.. الشهر العقاري..!! × العبقرى الذى قام بتعديل قانون الشهر العقارى إيديه تتلف فى «حديد»، فمن الواضح إنه كاره البلد والناس وكاره نفسه.. فقد أضاف للمستحيلات الثلاثة المعروفة، وهى الغول والعنقاء والخل الوفى، مستحيلا رابعا وهو استحالة تسجيل أى عقار فى الشهر العقارى أمس واليوم وغدا.. ربنا يدى له على قد نيته قادر ياكريم..! × بدون زعل.. المشهد الإعلامى الراهن قد يسر عدوا، لكنه لا يسر أبدا حبيبا ولا وطنيا مخلصا لهذا البلد، فالمشهد كله تنمر وإهانات وسفالة وتجاوزات ضد الصعايدة والفلاحين؛ بل وضد شعبنا الطيب كله، ناهيك عن وصلات الردح المتبادلة والشتائم وإشاعة روح التعصب والكراهية فى القنوات الرياضية وغيرها..!.. بصراحة دا مش إعلام دولة كبيرة عظيمة عريقة فى منطقتها والعالم بحجم مصر.. دا إعلام عايز قطم رقبته.. لامؤاخذة..!! × بالمناسبة أنا شفت من حنجورية  برامج التوك شو صوت وصورة، وهو بالمناسبة الحنجورى  نفسه اللى أهان أهلنا فى الريف والصعيد فى برنامجه منذ أيام، بيزعق وعروقه نافرة وبيشخط فى المشاهدين: اللى مش عاجبه ياخد باسبوره ويسيب البلد ويورينا عرض كتافه..!! آه والله قال كدا وكأنها بلد أبوه واللى خلفوه..!! بذمتكم دا إعلام فاهم دوره...؟!! والنبى افتكروا لنا حاجة عدلة..!! × بصراحة أنا مافهمتش الدكتورة هالة السعيد وزيرة التخطيط  تقصد إيه بتصريحها المستفز عن أن المواطن يكلف الدولة أكثر من مليون جنيه منذ ولادته وحتى سن الستين..؟!! يمكن قصدها إن كل مواطن يعلق يافطة على ضهره بتقول: «ياناس يا شر كفاية قر.. ماتبصليش بعين رضيه بس للى اتصرف علىّ»..!! × على فكرة أنا ممنوع، بأمر الطبيب، من الكتابة عن الحديد والصلب وأصول البلد، اللى بيصفيها وزير قطاع التصفية العام عمال على بطال.. لأن الكتابة فى الموضوع ده بترفع لى الضغط، وبتفقع لى المرارة اللى حيلتى، والإستبن شاحح من السوق..!! × إلى الممثلة «إياها» اللى فرحانة بمؤخرتها: صحيح أنت أخدت براءة فى أول قضية.. لكن فى انتظارك النهاردة الحكم فى القضية التانية..ومش كل مرة تسلم الجرة ياقطة..!!