آخر كلام

آخر كلاممحسن حسنين

الرأى19-10-2021 | 21:20

محسن حسنين

مش داخل دماغي خالص المبررات التي جاءت فى قرار وزير التربية والتعليم بمنع تصوير التلاميذ داخل الفصول..!!


فإصدار مثل هذا القرار يؤكد أن هناك «بطحة» على رأس العملية التعليمية نعرفها جميعا ويعرفها قبلنا الوزير نفسه؛ وهى تكدس الفصول بطريقة لا آدمية ونقص المدرسين..


وإذا أردنا الحق مش ابن عمه فإن علاج هذه «البطحة» ليس بإصدار قرارات فوقية عنترية بإخفاء «جسم الجريمة»؛ بل بزيادة مخصصات التعليم، حسبما نص الدستور، لبناء المزيد من المدارس وزيادة عدد المعلمين، وتحسين وتطوير المناهج..
هذا هو الحق الذى أعرفه..أما ابن عمه فمعرفوش خالص.. ومش عايز أعرفه..!!


بأمارة إيه سعر البيضة يصل لاتنين جنيه ونص..؟! هى الفراخ بيربوها فين..؟ فى مزارع ولا فى مدارس لغات.. وبيأكلوها إيه..؟ علف وللا كافيار وسيمون فيميه..؟!!


اللى بيحصل ده استغلال واحتكار.. وعيب.. ومش عارف الحكومة ساكتة ليه.. ومستنية إيه..؟!


افتحوا باب الاستيراد خلوهم يتأدبوا.. والبيض اللى عندهم يمشش ويرموه فى الزبالة..!


أسعار كل السلع فى الأسواق اشتعلت حتى سعر المش والجعضيض.. ومعدل التضخم بقى فى السما.. وبيلتهم سعر الفايدة فى البنوك حوالى مرتين ونص.. كل ده والبنك المركزى المنوط به قانونا السيطرة على معدلات التضخم، مش واخد باله وعامل نفسه من بنها..!!


بالمناسبة.. «جزار» انتهز فرصة انخفاض أسعار الفائدة فى البنوك وأغرق الإنترنت إعلانات يدعو فيها المواطنين لتوظيف أموالهم من خلاله مقابل 30%؛ أي أكثر من ست مرات أعلى من أى سعر فائدة فى البنوك..!!
يا ريت الجهات المعنية تشوف لنا إيه حكاية هذا «الجزار» قبل أن «يدبح» المزيد من ضحاياه من الغلابة الذين يبحثون عن عائد مناسب لتحويشة عمرهم.. فالمشرحة، بصراحة، مش ناقصة قتلى..!!
مش عارف ليه راسهم وألف سيف ما يذيعوش جلسات البرلمان على الهواء مباشرة..؟!
هو أنتم خايفين من حاجة لا سمح الله.. دا نوابنا ميت فل وعشرة.. وأحسن نواب فى الدنيا بيقولوا موافقون موافقة.. والنائب من دول رافع إيده على طول حتى وهو نايم..!!
ذيعوها يرحمكم الله.. فالناس مرعوبة من كورونا وبلاويها والنفسية تعبانة ومحتاجة شوية فرفشة ونعنشة..!!

أضف تعليق