× الناس على وسائل التواصل هاتك يانصايح للستات بالاهتمام بإعداد فطار جامد لأزواجهم قبل ما يروحوا الشغل.. تحت شعار " فطّريه قبل ما سلوى زميلته فى الشغل تفطره"..!
زميلتى سلوى مين وبتاع مين اللي تفطرني معاها فى الشغل..؟!
دا ولا مليون سلوى تقدر تفطرني.. أنا مفيش حد يقدر يفطرني فى الشغل إلا.... زميلتى "متيحة"..!!
× بصراحة أنا مش عارف اللي عمالين يندبوا ليلا فى برامج التوك شو من البلاوي السودا اللي هايشوفها الشعب بسبب الغلا والكوا عايزين مننا إيه بالضبط..؟!!
ارحمونا.. الحكاية مش ناقصاكم والناس مش مصدقاكم.. فكلكم بتاخدوا هبر بالملايين.. وشغالين شغلة واتنين وتلاتة وعشرة؛ وبعضكم بيقبض من مؤسسته الصحفية مرتبات وحوافز وأرباح من غير ما يكتب كلمة واحدة تخزي العين..!!
لا أجد ما أقوله إلا ما جاء فى كتاب الله عز وجل: " أَتَأْمُرُونَ النَّاسَ بالْبرِّ وَتَنسَوْنَ أَنفُسَكُمْ"؛ وما قاله أبوالأسود الدؤلى: "لا تنه عن خلق وتأتى مثله.. عار عليك إذا فعلت عظيم"..!!
× الناس على الفيس بوك مفبركين صورة لـ" الأسطورة" وهو حاضن الواد المجرم بتاع المنصورة اللي دبح زميلته بدم بارد على مرأى ومسمع الناس اللي واقفه تتفرج..!
رغم أنها صورة متفبركة لكنها بمليون كلمة.. كل كلمة ليها معنى وحكاية ورواية؛ وإدانة لكل اللي شيطنوا الشباب..!
فكل بلاوي المجتمع زادت بعد أفلام العنف ورقص الممثلين بالسيوف والسنج وهم عريانين..!
عايز أقول كلام كتير لكن مش هاأقوله علشان أنا مؤدب.. ومابتطلعش مني العيبة أبدا.. خاصة الشتيمة بالأب والأم..!
× بالمناسبة.. أستاذ فى كلية الزراعة.. خدوا بالكم أستاذ.. بيقول إن طالبة المنصورة مجني عليها وجانية فى نفس الوقت؛ لأنها مش لابسة حجاب.. وإن القاتل برضه جاني ومجني عليه.. أما القاتل الحقيقي فهو اللي قفل دور تحفيظ القرآن و"الكتاتيب".. أي والله الكتاتيب..!!
مرة تانية، بأكد إني مش ها أرد على الكلام ده.. لأني مؤدب.. وما بتطلعش مني العيبة أبدا.. خاصة الشتيمة بالأب والأم..!!
× عيد أب إيه وكلام فاضي إيه..؟!!
بذمتكم إنتم مصدقين الهجص دا..؟
طب عينى فى عينكم كدا..؟!!
× مش عارف إيه السبب اللي خلى الممثلة المخضرمة فجأة تشتم زميلها الممثل المخضرم وتهاجمه هجوما عنيفا بسبب أفلامه التي ترى أنها بتفسد الشباب.. وكأن بسلامتها كانت بتشتغل دكتورة أو باشمهندسة مش ممثلة..؟!
يا ست الستات بلاش إنت..!
فالمثل بيقول: لا تعايرني ولا أعايرك الهم طايلني وطايلك..!!
× بصراحة أنا مش عارف الزملكاوية فرحانين ليه؛ والفرحة مش سيعاهم لأنهم اتعادلوا مع الأهلي فى مباراة مش قد كدا..!
ناقص يقولوا إن الماتش انتهى اتنين اتنين لصالح الزمالك..!!
على فكرة أنا لا أهلاوى ولا زملكاوي.. لكن الدم اللي بيجري فى عروقي أحمر.. والقلب اللي بينبض فى صدري أبيض.. بخطين..!!