كاتبة كبيرة (س. ر) استنكرت ما كتبته الأسبوع الماضى وقالت لى: وماله يا أستاذ لما الناس تشترى فيلا بـ 115 مليون جنيه فى الساحل الشمالى.. إيه الغريب
فى كدا..؟!
طبعا أنا معاها قلبًا وقالبًا، وشايف إنها حاجة عادية جدًا إن الناس تقف طوابير وتعمل أزمة من غير لزمة لشراء "الفلل" أم 115 مليون جنيه..!!
ونروح بعيد ليه أنا شخصيًا بأخش السوبر ماركت بالميه وخمستاشر مليون جنيه وبأخرج ومعايا ربع بسطرمة ونص جبنه براميلى وربع زيتون أسود وربع حلاوة طحينية، وبآخد بباقى حساب الـ 115 مليون لحلوح "ملبساية" من أم شلن...!
كل دا بفضل الحكومة اللى مش حرمانا من حاجة خالص.. إيشى مرتبات ومعاشات .. وحاجات ومحتاجات.. وفوقيهم البلح الأمهات..!!
سامحنى يارب..!
ممثلة مخضرمة لقت إن كل من هب ودب بيتكلم فى الدين اليومين دول وما حدش بيحاسبه ولا بيقول له تلت التلاتة كام.. قالت وليه أنا كمان ما أفتيش زى ما الكل بيفتى..!!
فقالت، لافض فوها وعاش حاسدوها: إن سيدنا عمر بن الخطاب هو اللى فتح مصر، وإنه من "الأربعة المبشرين بالجنة"..!!
يا سلام عليكى ياست الكل .. إيه الحلاوة دى.. واضح إن كلامك ده جايباه من "نخاشيش النخاشيش"، وإنه متفق عليه من " الجماعة".. قصدى "الجماعة" أصحابك فى " الناتى" يعنى ..!
نصيحتى لست الكل.. نقطينا بسكاتك ياهانم.. فالحكاية مش ناقصة حضرتك خالص.. دا إحنا لسه ما خلصناش من فتاوى الشيخ العاشق للفضائيات وفلوسها المتلتلة، وافتكاسات الدكتور "نقصان".. وتهويمات الأخ أبوحمالات.. وزعيط ومعيط ونطاط الحيط..!!
هى الكورونا دى ماورهاش حد غيرى فى البلد..؟!
دى بقت حالة عشق بين الكورونا وبينى .. أكتر من أسبوعين يا محترم وهى مش سايبانى ومبهدلانى.. رغم إنى مواطن صالح وماشى جنب الحيط وواخد التلات تطعيمات اللى قررتهم لى حكومتنا الموقرة..!!
والله عيب.. هى الكورونا دى ماعندهاش إخوات صبيان..!!
بعد ما تابعناه من اعترافات كبار اللعيبة والمدربين المصريين صوت وصورة عن عمليات "تفويت" المباريات، وعن الحكام اللى ذمتهم أوسع من محور روض الفرج
اللى كانوا بيبيعوا ذمتهم قطاعى بسعر الجملة.. أنا شايف إننا حرام نسمى الكورة عندنا "الساحرة المستديرة".. دى بقت "الساحرة الشريرة".. والعياذ بالله..!!
عصرت على دماغى ليمونة وقلت أشوف بتوع المهرجانات بيقولوا إيه دلوقت..؟!
يا ليلة سودا.. عيال شكلهم مايطمنش بيدعوا الشباب صراحة لشرب المخدرات والخمرة وحمل الأسلحة والبلطجة، بالإضافة للشتايم وقلة الأدب والألفاظ الزبالة..!!
لابد من وقف هذه السفالات فورا بتطبيق قانون البلطجة على بتوع المهرجانات.. لأننا كدا رايحين فى ستين داهية.. ربنا يستر على شبابنا..!!