آخر افتكاسات الشيخ "إياه" أستاذ "الفقه"، عاشق الأضواء و الفضائيات وفلوسها المتلتلة، إنه بيطلب من "الفقهاء" البحث عن طريقة للشباب لتفريغ طاقاتهم الجنسية بعيدًا عن الزواج..!!
يا ليلة سودا هي وصلت لتفريغ الطاقات الجنسية من غير جواز..؟!
مادام حضرته "فكيك" كدا.. ليه بيطلب من "الفقهاء" يبحثوا.. ما يبحث هو.. أمال بسلامته بيشتغل إيه..؟!!
هو مش حضرته "أستاذ فقه" برضه وللا مبيض محارة..؟!!
يا ريت بسلامته يطلع يقول لنا، بس ياريت على الهواء مباشرة، إزاي الشباب يفرغ طاقته الجنسية من غير جواز.. مع شرح واف، وبيان عملي على المعلم، اللي هو حضرته.. علشان بوليس الآداب "يعكشه" بتهمة الفعل الفاضح ونشر الفاحشة وخدش الحياء العام.. فنرتاح منه ومن افتكاساته اللوذعية اللي بتودي فى ستين داهية..!!
يا جماعة الخير.. والله العظيم المهرجانات واللى بيؤدوها أكبر سُبة فى جبين القوة الناعمة المصرية..!!
فالمهرجانات ومطربوها، إن جاز لى أن أسميهم مطربين، جرائم مكتملة الأركان.. معظمهم بيحرضوا على التحرش والضرب؛ بل والقتل ومقاومة السلطات تحت شعار
إنهم "مابيخافوش"..!!
وبدون زعل نقابة المهن الموسيقية أصبحت عاجزة لا حول لها ولا قوة أمام سطوة ونفوذ مطربى المهرجانات.. ولا تستطيع أن تفعل شيئا لمواجهة نموهم السرطانى؛ لذلك أطالب مرة أخرى بمحاكمتهم بقانون الإرهاب.. فما يرتكبونه إرهابًا مع سبق الإصرار والترصد، لكن.. بالطبلة والزمارة...!!
بأمارة إيه يزودوا الضرايب العقارية 30% على شقق الساحل الشمالى..؟!
فالمعروف أنه لا تفرض ضريبة إلا بقانون يوافق عليه مجلس النواب.. فهل وافق المجلس على هذه الزيادة.. لا أظن..!
طبعًا أنا عارف إن ماحدش هايتعاطف مع سكان الساحل الشمالى؛ على اعتبار إنهم من أصحاب الملايين والرولزرويس واللامبورجينى.. لكننى والله من الساحل الشمالى "الطيب" اللى ماشى جنب الحيط، وعايش على الكام ملطوش بتوع المعاش، واشتريت الشقة اللى قاعد فيها من تلاتين سنة بملاليم من تحويشة العمر، وبالشقارة والنقارة وبالتقسيط "الممل" كمان مش المريح..!
يعنى أخوكم ساحل شمالى آه بس "على الحديدة".. وبأفكر جديًا.. أبيع الحديدة..!!
رغم إنه مش داخل دماغى خالص حكاية إن الستة أيام فى العلمين الجديدة بمليون جنيه..!
إلا أننى من باب القافية، اللى بتحكم مش أكتر، عايز أحجز لى خمس دقايق؛ ومستعد أدفع تمنهم عدًا ونقدًا جنيه ينطح جنيه؛ بشرط إنهم يدونى "إيصال" بدخول الجنة من غير حساب ولا سابقة عذاب..!!
من حق الأهلاوية يزعلوا لضياع الدورى.. ومن حق الزملكاوية يفرحوا بفوزهم بالدورى.. لكن مش بالقوى كدا..!!
أمال لو كنتم بتلعبوا كورة بحق وحقيقى كنتم عملتوا فينا إيه..؟!