مش عارف أجيبها للحكومة إزاى..؟!
فمن الواضح للكل كليلة إن التجار والمنتجين بيتحدوا الحكومة وبيطلعوا لها لسانهم اللى يستاهل قطعه؛ فقد رفعوا أسعار كل شىء وأى شىء بحجة ارتفاع سعر الدولار والحرب الأوكرانية الروسية..!
وإذا لم يكن ما يحدث من غلاء مصطنع تحد للحكومة التى تقف عاجزة قليلة الحيلة أمام التجار والمنتجين فماذا نسميه..؟!!
الكل شايف وعارف اللي بيحصل لكن من الواضح إن الحكومة هى آخر من يعلم إن ما يحدث هو تحد سافر لها..!
وبذمتكم هل كنا نتخيل، ولو فى أسوأ كوابيسنا، أن يصبح البيض و الفراخ سلعا استفزازية.. ومعهم الزيوت واللحوم والأسماك..؟!
صدقونى.. لقد قويت شوكة التجار والمنتجين حتى باتت تهدد أمننا الاجتماعى؛ وعلى الحكومة أن تسارع بكسرها اليوم قبل غد؛ إما بفتح باب استيراد الفراخ و البيض و اللحوم؛ أو بتطبيق قانون الاحتكار على المنتجين والتجار الفجار..
إن مصداقية الحكومة وقوتها على المحك الآن.. إما أن تكسر شوكة المحتكرين والمحتكرات وتنتصر للمواطن الذى أقسمت على رعاية مصالحه.. أو تترك الحبل على البهلى للتجار ليسوقوا الهبالة على الشيطنة ويهددوا أمننا الاقتصادى والاجتماعى..!
على فكرة أنا مش باأحرض الحكومة على التجار والمنتجين أنا جاى بس أهدى النفوس مش أكتر..!!
كلمة فى أذن وزير ماليتنا الهمام: ياريت تنسى الجباية خالص.. فاليومين دول مش وقت فرض ضرايب جديدة خالص.. الناس مش ناقصة..
والغلا والكوا مبهدل الدنيا..!!
هي حاجة من اتنين إما إن معاليك مش متابع اللى بيحصل فى البلد.. أو إن إحنا اللى مش من البلد دي..؟!
ولإن وزراء حكومتنا عارفين كل حاجة وعمرهم مابيغلطوا أبدا.. فمن الواضح إن إحنا اللى مش من البلد دي!!
× مش عارف ليه البعض مرعوبين من بيع أحد الفنادق المطلة على النيل وبيصوروا الحكاية على أنها استعمار للبلد..؟!
يا جماعة القيامة مش هاتقوم لما يتباع فندق.. دي حكاية بتحصل فى كل دول العالم.. فى أمريكا وبريطانيا وفرنسا.. بيبيعوا فنادق ومحلات وملاهي وأندية كرة وشركات.. وغيرها.
أنا شخصيا مع بيع الفنادق والملاهي والأندية والشركات؛ لكننى فقط ضد بيع الشركات الاستراتيجية التى قد يمثل بيعها خطرا على أمننا القومى؛ بل أزيدكم من الشعر بيتا فأقول إننى أرى أن تظل هذه الشركات فى حوزة الدولة للعديد من الأسباب التى ذكرتها فى مقالات سابقة.. منها مواجهة أية اتفاقات احتكارية وضبط حركة السوق وتوفير المنتجات الأساسية للمواطن بأسعار مناسبة. .!!
نصيحتى للبعض: بلاش الحساسية الزايدة دي.. وبلاش "حمبلة".. سيبيه يمسكها يا فوزية..!!