سلطت زهرة رامي، في برنامجها حكايات جوابات، في موسمه الثاني والذي تقدمه على راديو إنرجي 92.1، رسالة خاصة كان قد ارسلها الموسيقار مودي الإمام إلى الفنان الراحل حسين الإمام.
قالت زهرة في بداية حديثها أن مصدر الرسالة هي رسالة نشرها مودي الإمام عبر حسابه الرسمي على فيس بوك، في مايو 2016 في الذكرى الثانية لرحيل حسين الإمام.
وجاء نص الرسالة التي قدمتها زهرة رامي: " "تصدق ؟أنا لسة باحس وأنا باعدي الشارع، إنك هاتاخدني من إيدي عشان أبقى في أمان وماتوهش !لسه عاوز أحكي لك أنا قد إيه بقيت سباح ماهر، وعن الشجرة العالية إللي تسلقتها، و عن آخر حيلة علمتها لروي كلبنا".
وتابعت رامي قرائتها للرسالة وقالت: "لسه حاسس إني محتاج أوريك قد إيه أنا عازف ماهر على الدرامز والبيانو، والجيتار، ورسام ممتاز، زي ما علمتني، لسه مستني تزورني، عشان تعلمني چودو ومصارعة روماني، ونغني سوا، ونضحك لما عينينا تدمع ... زي ما إتعودنا ولسه عاوز أطبخ لإثنين، عشان لو إتصلت وزرتني ناكل سوا وندردش، ونعزف ونغني ولسة مستني رنة تليفونك وسؤالك عن صحتي، و أحوالي بإلحاح ، زي عوايدك.
وأضاف مودي الإمام في رسالته لحسين: " لسة حاسس إنك هاتزعق ، وتخلي بلطجية حوش المدرسة يجروا من قدامك زي الفراخ وأنا واقف جنبك، قصير، وفخور... مزقطط. ولسة عاوز أثبت لك قد إيه أنا بقيت قوي ، وماهر ... وفاهم ... وشجاع .أنا لسة باتجاهل مكالمات صحافيين النميمة الساقطين، وغلظة قلوبهم، وأكلهم للنار من فلوس حرام جت من نبأ الفاسق وحديث الإفك والفتنة ، وأكلهم للحم البشر، زي ما نصحتي تمام.وأحب أطمئنك، إني لسه بانظف بيتي بنفسي ، وأغسل وأكوى ملابس ، وأعالج جسمي ، وأعمل تمارين، وباتمرن وعزفي وصوتي أحسن من كل وقت فات من بعد ما بطلت التدخين بسنين".
وجاء في ختام الرسالة: "لما باتكلم مع نفسي وأنا لوحدي، باسمعك في صوتي ، وباهدأ ، وأطمئن ... وأرتاح بإسم ربنا الذي لا يضيع عنده شيء و لا ينسى أحد... وهو أرحم الراحمين.ماعنديش شك إننا هانجتمع تاني، زي عوايدنا، وها نعزف سوا، ونغني، ونضحك من القلب...كإننا روح واحد ، لكن له عقلين، وجسمين.كل سنة وإنت بكل خير وسعادة، يا أخويا الكبير الحبيب... يا حسين".