يبدو إن طريق مصر إسكندرية الصحراوي صابته عين الحسود اللي فيها عود يا حلاوة..!!
فكل ما الطريق يتعمل ويبقى زي الفل يكسروه ويعيدوا عمله من جديد..!!
ياريت منعا لعين الحساد، اللي تفلق الحجر، إنهم يحطوا فى أول الطريق خمسة وخميسة أو خرزة زرقا ومعاها يافطة كبيرة بتقول: "ماتبصليش بعين رضية بص للي اتصرف علىّ.. يا ناس ياشر كفاية قر"..!
عموما أنا قلتها وباأقولها فى كل مرة بيهّدوا فيه الطريق ويعيدوه: إذا كان اللى بنى مصر كان فى الأصل حلوانى.. فاللى عمل طريق مصر إسكندرية الصحراوى أكيد بتاع بسبوسة لا مؤاخذة..!!
إيه يا جماعة الهرتلة دى..؟!!
هو أى واحدة ماتسواش تلاتة تعريفة يسيبوها تشتم مصر و المصريين وتلعن سلسفيل اللى جابوهم وتمضى عادى لحال سبيلها..؟!
أنا طبعا باأقصد الممثلة "إياها" اللى شتمت المصريين؛ وقالت إنهم مايستحموش وإن ريحة رجليهم معفنة.. وإن الممثلين أسيادهم وتاج راسهم؛ وهما اللى عاملين ل مصر و المصريين قيمة وسيما..!!
أنا شخصيًا مش عاتب على الممثلة أم لسان زفر.. أنا عاتب على البابا والماما بتوعها اللى كانوا مشغولين لشوشتهم فنسيوا يربوها.. فهى محتاجة رباية من أول وجديد.. واللى ماربتهوش الأيام والليالى.. تربيه المحاكم من تانى..!!
× يا جماعة حد يشوف لنا إيه اللى حصل للبلطى سمك الغلابة.. وإيه اللى خلى أسعاره تناطح السحاب..!
أنا شخصيًا حذّرت الحكومة المصرية من حوالى أربعين سنة فاتت مما يحدث من احتكارات فى أسواق السمك.. من أول صيده حتى تسويقه،
وما يحدث فى أسوان وفى بحيرة ناصر وما أدراك ما بحيرة ناصر.. وعملت حملة صحفية عنوانها: "حتى لا تلتهم الحيتان ما تبقى من ثروتنا السمكية"..لكن لا حياة لمن تنادى..!
فعلى مدى أربعين سنة التزمت كل الحكومات الصمت والطناش.. وعملوا نفسهم من بنها حتى التهمت الحيتان.. حيتان البشر.. بالفعل ثروتنا السمكية بلا أى هناء أو شفاء..!!
ولا عزاء للغلابة..!
× بعد مسلسل هناء وشيرين.. ظهر لنا مسلسل جديد عن الشاكوش والسيدة حرمه.. يحكى فيه كل منهما ما حدث فى ليلة الدخلة بالتفصيل الممل..!!
مفيش واحد ابن حلال يقفل لنا حنفية المسلسلات الهابطة دى.. فالبلد والله العظيم مش ناقصة..!
× المطربة "إياها" اللى اسمها على غير مسمى.. مارست هوايتها المفضلة فى تأكيد عدم "الأصالة"؛ وأهانت مايسترو مصرى محترم وهى واقفة معاه على خشبة المسرح.. منتهى الجليطة وقلة الذوق..!
نقول إيه..؟! قليل الأصل لا تعاتبه ولا تلومه.. دا زى اللطعة لا بيطلع برابسو ولا بأومو..!!