إيه الفوضى و الهرتلة دى..؟!
إزاى الكوسة تبقى بخمسة وعشرين جنيها حتة واحدة..؟!
دا وقف حال للبلد كلها.. فالناس ماتقدرش تعيش من غير كوسة..!!
فالكوسة بتعدل المايل وبتسوى الهوايل.. وتجوز العتقية وتخليها صبية!.. فهى مفتاح كل الأبواب المقفولة.. وهى بتسوى المعجزات فى البرلمان والمحليات.. والصحة والمدارس والجامعات، تخليص المصالح فى دهاليز الحكومة والمتاهات..!!
أنا خايف إن حد يفتكر إن كلامى دا عن حاجة تانية غير "الكوسة" اللى عند بتوع الخضار أم خمسة وعشرين لحلوح..!!
أنا بقولها بعلو الصوت ومش خايف من أى حد.. أنا ياجماعة الخير باأتكلم عن "الكوسة" اللى عند بتوع الخضار؛ وأى تشابه بينها وبين أى كوسة تانية هو من قبيل الصدفة اللى هى خير من ألف ميعاد..!!
سامحنى يارب.
بعد استبعاد عدد كبير من المتقدمات لوظيفة معلم رياض أطفال بسبب وزنهن الزائد.. يبدو إن التعيين فى وزارة التربية والتعليم هايبقى
بـ "الكوسة" اللى بتتباع بـ "الكيلو"..!!
بالمناسبة.. هى الكوسة وصلت حتى للغنا كمان..؟!
فالكل بيغنى للعنب والمانجة والقمح وماحدش غنى أغنية واحدة عن "الكوسة" وفوايدها وعمايلها..!!
بلد بتاعة "كوسة" بصحيح..!!
التغييرات الأخيرة على الساحة الرياضية تغييرات عظيمة جدا؛ بس ياريت يتموا جميلهم ويغيروا الوشوش إياها اللى زهقنا منها، واللى بتولعها نار وبتعمل فتن بين جماهير الكورة..
فالبلد مش ناقصة فتنة كروية بين الأندية حوالينا مين نادى القرن ومين نادى القرنين.. لامؤاخذة ؟!!
نفسى ومنى عينى أن يخطف معالى وزير المالية الدكتور معيط رجله ويزور مأمورية الضرائب العقارية بمدينة الحمام المسئولة عن تحصيل مليارات الجنيهات من حيتان الساحل الشمالى..!!
فالمأمورية حاجة تكسف بصحيح..!!
فهى فى بيت آيل للسقوط.. وعدد الموظفين أقل من عدد أصابع اليد الواحدة.. وكل المعاملات تتم يدويا زى ما كانت أيام سيدنا عكروت..!!
على فكرة دى المرة الخامسة اللى باأكتب فيها عن هذه المأمورية التعيس، التى وعدنى رئيس مصلحة الضرائب العقارية فى حوار هاتفى معه منذ أربع سنوات، بأن يصل إليها قطار التطوير قريبًا جدًا جدا..!!
لكن يبدو أن القطر ماشى على قشر بيض؛ أو تاه فى السكة فلم يصل حتى الآن لمأمورية الحمام..!!