إيه البهدلة وقلة القيمة دي..؟!
إزاي أعضاء مجلس النواب الموقر يعملوا كدا في وزير التموين ويبهدلوه كل هذه البهدلة السودا.. دول كان ناقص يشتموا بالأب والأم..؟!
بصراحة أنا لو من وزير التموين كنت رميت لهم استقالتي فورًا في قلب المجلس الموقر.. وفي ستين داهية الكرسي والمنصب والموكب والحراسة والعربية المرسيدس والهيل والهيلمان والبتنجان.. المهم الكرامة..وياروح ما بعدك روح..!
لكن يبدو إني نسيت حاجة مهمة جدًا، وهي أن الوزراء عندنا يقالون ولا يستقيلون.. وإن الإحساس نعمة اللي ينكرها.. يعمي..!!
بالمناسبة إزاي مجلس الوزراء الموقر يسكت علي إهانة وزير من وزرائه بهذه الصورة.. المفروض إن المجلس يضرب كرسي في الكلوب ويرد علي إهانة وزير التموين بإستقالة الحكومة كلها.. فكرامة الوزير من كرامة الحكومة.!!
نعم يجب أن تستقيل الحكومة كلها علي بعضها..ويرتاحوا ويريحونا.. لو مش من باب المسئولية التضامنية.. علي الأقل من باب العشرة والعيش والملح.. العيش أبو شلن والملح أبو تلاتة تعريفة..!!
فالعشرة ماتهونش إلا علي ولاد...... الحلال..!
أيوه مشوها "ولاد الحلال" علشان خاطري.. أنا عندي عيال بأربيها..!
يا جماعة بطلوا هري ولت وعجن في موضوع محمد صلاح وإزاي بيلعب مع ليفربول وإزاي بيلعب مع منتخبنا الوطني..؟!
صدقوني "مو صلاح" بتاع ليفربول مش هو "محمد صلاح" بتاع المنتخب الوطني..
فمو صلاح بتاع ليفربول بياكل النجيلة أكل.. أما محمد صلاح بتاعنا ف"بياكل.... رز مع الملايكة".. لامؤاخذة..!!
إيه البشاعة دي..!
مش عارف الناس زعلانة ليه من عودة السيدة نجاة الصغيرة للأضواء مرة أخري لحضور حفل لتكريمها..؟!
قال إيه لأن السن ليه أحكام؛ وإنها كان يجب أن تختفي تمامًا إحترامًا لسنها بعد أن وصلت للخامسة والثمانين..!
بصراحة الناس دي في منتهي الجليطة؛ ومفيش في قلوبها رحمة ولا ذرة إحساس..
إنتم مين علشان تحكموا علي فنانة محترمة رقيقة ملتزمة، هي أحد أعمدة قوانا الناعمة، بالإعدام بسبب عمرها؛ وبدلاً من أن تدعوها لحب الحياة التي وهبها الله لنا بتطالبوها بأن تبحث لها عن تربة قبل الترب ماتغلي..؟!
بطلوا قرف بقي.. قرفتونا..!