مش عارف الناس زعلانة ليه من إن كيلو "البانيه" بقى بتلتمية جنيه..؟!
يا جماعة التجار "الفجار".. آسف قصدى الشطار.. عداهم العيب وقزح.. فهم مابيربوش الفراخ دلوقت في مزارع وعنابر زي زمان.. دول بيربوهم فى مدارس لغات بالشىء الفلاني ..!
بيربوهم فى الليسيه فرانسيه .. و الميردي دييه ..ومدارس "ردي يابنت أخت البيه"..!!
بمناسبة الأسعار الفلكية لـ " البانيه ".. الستات كاتبين على الفيس بوك بيقولوا: "ماحدش يقول لي .. تعويم الجنيه ولا تفطيس الجنيه.. كلمونى بـ " البانيه ".. البانيه هايرخص.. البانيه هايغلى.. البانيه هايتلغى.. هى دى الحاجة الوحيدة اللى بنفهمها"..!
شعب لذيذ.. دمه خفيف.. مالوش أى كتالوج..!
جميل جدًا أن تقوم الحكومة باستغلال جزء من قيمة صفقة رأس الحكمة فى الإفراج عن كل السلع ومستلزمات الإنتاج المكدسة منذ شهور فى الموانئ لتشغيل المصانع المتوقفة عن الإنتاج.. وهى خطوة تحسب لها لا عليها..
لكن الأجمل لو أتمت الحكومة جميلها وقامت بتوجيه جزء آخر من قيمة الصفقة لتخفيف الأعباء عن متوسطى ومحدودى الدخل؛ بتوفير السلع الأساسية بأسعار رخيصة، ولو بفتح باب استيرادها على مصراعيه..!
فالتجار الفجار ولعوا الأسعار.. والناس مخنوقة وبتكح تراب.. ولن يفل الحديد إلا الحديد..!
رجل الدين اليهودى اللى طالب بإبادة كل الفلسطينين عن بكرة أبيهم.. نساء ورجال وأطفال.. أكيد دا مش رجل "دين".. دا راجل "ديك".. لامؤاخذة..!
الناس هاتك يا هرى اليومين دول عن غش البن.. والوصايا العشر لاكتشاف فنجان القهوة المغشوش.. اللى يقول لك.. أعصر لمونة على الفنجان فإذا فار يبقى مخلوط بكربوناتو.. أما إذا "كلكع" فيبقى مخلوط بنشا.. أما إذا تغير لونه فهو مخلوط بالقمح..!
يا ليلة سوخة.. الكلام دا معناه حاجة واحدة بس إن أسلم طريقة لشرب فنجان قهوة مظبوط هو إن الواحد ما يشربوش فى كافيه.. دا يروح يشربه فى المعمل الجنائى بتاع وزارة الداخلية..!!
واضح إن المطرب الخليجى "إياه" ساعة الغلط "بيطرطش زلط".. فبعد ما غلط غلطته الشهيرة فى حق مصر أم الدنيا.. غلط فى أبوه اللى رباه..!
فقال "فض فوه وعاش حاسدوه" أنه لم يرث من أبيه إلا الكحة فقط..!
لسانه زالف يستاهل قطعه مش كدا.. لكن العيب مش عليه .. العيب على اللى ربى..
فاللى ربى بتاع مربى.. لا مؤاخذة..!!