× يا حلاوة أم إسماعيل فى وسط عيالها..!
الإعلامية اللى قبضوا عليها مؤخرًا بتهمة الإتجار فى المخدرات اكتشفوا إنها مش واخدة غير شهادتين بس.. شهادة الإبتدائية.. وشهادة الميلاد..!
وماله ياجماعة.. كفاية إنها خريجة إعلام "ماقال لى وقلت له يا عوازل فلفلوا"..!
× واضح إن فوضى الرسوم البنكية المجحفة ليست قاصرة على بنك الإسكان والتعمير فقط؛ فرسوم البنك العربى الإفريقى مبالغ فيها هى الأخرى.. فالبنك يخصم 50 جنيه شهريًا من أى عميل لم يسجل رقم بريده الإلكترونى.. ويحصل على رسوم 250 جنيها لكل من يريد ورقة برقم حسابه.. كما يخصم رسومًا شهرية من أى عميل يقل حسابه عن 5000 جنيه ولو بجنيه واحد.. وهذا الكلام يؤكد أن كل بنك بيفرض ما بدا له من رسوم دون أى ضابط أو رابط..!
واللى غايظنى إن كبار المسئولين بيتساءلوا وبراءة الأطفال فى أعينهم: هى الناس مش عايزة تحط فلوسها فى البنوك ليه؛ وبتروح تحطها عند النصابين بتوع شركات توظيف الأموال اللى يسرقوا الكحل من العين.. المستريح واللى مش مستريح والشاجع والهاجع والنايم على صرصور ودنه..؟!
بذمتكم مش عارفين ليه..؟؟ طيب عينى فى عينكم كدا..!!
× فى نفس ذات اللحظة.. القيامة قايمة على مجرم الحرب برخصة النتن ياهو والحاج ابو حنان المنتشى بغروره..!
النتن بعد أن فضحه رئيس الشاباك وفضح جرائمه فضيحة اللحمة البتلو فى سوق الجمعة.. و ترامب لتعيينه وزير دفاع لا يفقه الألف من كوز الدرة فى مسائل الحفاظ على الأمن القومى الأمريكى..
طبعا إحنا لا ناقة لنا ولا جمل فى كل هذه الزيطة والزمبليطة؛ لكننا ندعو الله أن تستمر كمان وكمان؛ وأن يهلك الظالمين بالظالمين ويخرج العالم من بينهم سالمين.. اللهم آمين.
× كنت عايز أعصر ليمونة على دماغى علشان أستوعب كل اللى بيحصل من من بلاوى فى السياسة والاقتصاد والفن والإعلام.. لكننى تراجعت فى آخر لحظة لما لقيت كيلو الليمون بقى بـ 130 جنيها..!
عموما هاتعمل إيه لمونة واحدة فى بلد قرفانة..؟!