كلام الحاج أبو "جنان" عن قناة السويس .. وأن لولا أمريكا ما كانت القناة بيؤكد إن الراجل هبت منه خالص؛ وإنه يا ولداه دخل في مرحلة الهلاوس والضلالات والتهيؤات..! والحالة دي بتفكرني بإتنين "الواد حمامة بتاع التليفونات".. وخالتي شفيقة..!
فالواد حمامة بتاع التليفونات بيدعي زورًا وبهتانًا إنه شارك في كل الأحداث التاريخية الكبري .. فهو اللي طرد الحملة الفرنسية من مصر.. وهو اللي قام بثورة تسعتاشر بعد أن كانوا تمنتاشر.. فانضم ليهم وبقوا تسعتاشر فقامت الثورة.. وهو الذي أطفأ حريق القاهرة ..!!
أما خالتي شفيقة، بتاعة إسماعيل ياسين في سراية المجانين، فدي عندها شعرة.. ساعة تروح وساعة تيجي.. ساعة تروح وساعة تيجي.. وبعدين هييييييه.. راااااحت..!
آه يا دماغي..!
بالمناسبة.. معالي السفير أحمدين مندوب مصر الدائم في الأمم المتحدة سابقا يري إن مصر لابد أن ترد رسميًا وبقوة علي كلام الحاج أبو جنان علشان مايسوقش فيها..!!
أنــا شخصيًا شــايف إن لا الرئاسة ولا الخارجية المصرية هي المعنية بالرد علي كلام الحاج أبو جنان اللي كله جنان في جنان.. الوحيد اللي يمكنه الرد عليه هو أستاذنا الدكتور أحمد عكاشة أكبر خبير في علاج مرضي الهس بس.."اللي عقلياتهم ترا للي".. علي قولة إخواننا اللبنانيين..!
نقول إيه.. ربنا يشفي..!
أنــا شــايف إن كل الوســائل التــي يستخدمها الكيان الصهيوني لإطفاء الحرائق التي اشتعلت فجأة في الغابات وداخلة علي المستوطنات.. كلها وسائل فاشلة ولن تجدي نفعا..!
فأنا كخبير جامد جدًا.. شايف إن أفضل طريقة هي رش الحرايق بـ "البنزين".. أيوه البنزين.. ومش أي بنزين.. لازم بنزين خمسة وتسعين.. علشان الحرائق تنطفي بسرعة..!
ربنا يقدرني دايما علي فعل الخير.. مش عارف من غيري كانوا هايعملوا إيه..؟!
عرض السلطة الفلسطينية مساعدة إسرائيل في إخماد الحرائق فكرني بالعديد من الأمثال الشعبية الفلسطينية المعبرة جدًا عن الموقف الشهم للسلطة الفلسطينية من عينة المثل اللي بيقول: "أعمص وبيتجعمص"..!
وطبعًا مش هاأذكر باقي الأمثال لأني مؤدب ومابتخرجش العيبة مني أبدًا..!!
مش عارف "الشيخ" عاشق الأضواء والأهواء عايز إيه بالضبط..؟!
عمال يزيد ويعيد، في كل القنوات، في كلام عجيب وغريب ماأنزل الله به من سلطان لإقناع السيدات بخلع الحجاب.. وكأن لبس الحجاب كفر والعياذ بالله..؟!
بصراحة هو بكدا يستحق لقب "الرجل العناب قاهر الحجاب".. كما يستحق عن جدارة أكبر جائزة في الدنيا وهي"تاج الجزيرة" بتاع أخونا مرزوق العتقي.. السلطاااااااانية..!